Кузе мый «шем спискыш» логальым?

Кызыт социальный сеть нерген палыдыме еҥым кечывал кечын тул дене кычалын от му. Самоизоляций режим кудло вич ий деч кугурак ийготан пенсионер-влакымат тушан вӱраҥлен шындыш докан. Ик уреман изи ялыште илыше шоҥгет-влакат ынде икте-весыштым социальный сетьыште веле ончат. Шочмо кече гын, пеледыш аршашым эр-эрденак пӧлеклаш лиеш. Пайрем кузе эртыме нергенат вигак видео- але фотоотчёт гоч пален налына. Айдеме, икте-весыж деке миен-толын илыдеак, вес еҥын илышыже, канышыже нерген чыла пала. Ракат!

Мыят социальный лаштыкыште шинчаш йӧратем. Тӱрлӧ группын увержым, заметкыжым лудам, видеом, фото-влакым ончем. Теве ик марий, мотор деч мотор фото ӱмбалан почеламутым, ушан ойым але калыкмутым возен, лаштыкеш вераҥдылеш-вераҥдылеш. Ончышо еҥ-влак фотожо йымалан комментарийым серат, знак да символ-влак дене шке кумылыштым ончыктат. Мыят ятыр жап тудын фотожо-влакым «с восхищением» ончышым. Икана тиде марий «Чолман» газетеш савыктыме калык вургеман изи ӱдыр-влакын картычкыштым лаштыкешыже шындыш. Газетыште чинче ӱдыр-влакын «Изий» йомакым модмышт нерген возалтын ыле. Варарак колымшо курымын пелыштыже возымо сылне почеламутым вераҥдыш. Тунам мыят комментарийым возаш лийым: «Почеламутын авторжым молан огыда ончыкто? Авторский правам пудыртеда лиеш вет…» Фото йымаланат «Кӧн фотожо, молан огыда палемде?» манын йодде шым чыте. (Газетыште лудмо почеш изиш шарнем, Карлова гай чучеш). Вашмутым монь вучен шым шукто. Эрлашыжым умылышым: тетла тиде марийын ик фотожымат ончен ом керт. Тыге возалтын: «Информация недоступна. Этот пользователь добавил вас в чёрный список». Уке, мый нимынярат шым ӧпкеле. Тидын нерген мый денем пырля пашам ыштыше ӱдырамашлан воштыл ойлышым. «Эх, Анатольевна, тый молан талантан еҥын кушшаш творческий корнешыже ыресым шындылат, а? Пычалже лиеш гын, тыйым лӱя ыле вет», - шыргыжале тудо. Мом ыштет? Лийшаш лийын.

Мом каласынем? Социальный сетьыште шинчена, мыланна «классым», «лайкым» шындыше да подписчик шукырак лийже манын тыршаш тӱҥалынна. Калыкна гыч лекше талантан поэт, писатель, художник, фотограф-влакын пашашт чонланна келша, тидын нерген молыланат каласымына шуэш гын, шкеныштымат пагалыман огыл мо вара? Кеч изи буква дене авторжым палемден кодыза ыле.

Изображение Lubos Houska с сайта Pixabay

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».