Пайремат тиде кож воктенак эртыш. Тунемше-влак тӱрлӧ модыш дене модыч, мурышт, почеламутым ойлышт. Чыланат Йӱштӧ Кугыза деч пӧлекым нальыч, йывыртен, мӧҥгӧ вашкышт.
Арня мучко школ тӱрлӧ мероприятий-влакым эртарыш. Ик кече ече дене чодыраш коштын тольыч. Тӱҥалтыш классыште тунемше-влак кок кече школ воктен тӱрлӧ модыш дене модыч. Йоча-влак виртуальный экскурсий дене Эрмитажыш «мийышт». Клуб воктене ава-ача-влак дене пырля «Весела старт» таҥасымашыш ушнышт. Модшо-влак пӱжалт пытышт. Ончаш толшо-влакат яра ышт шого.
Вес кечынже Шорыкйол гӱжлыш. Васли кугыза кастене шке ешыж дене уремыш пайремым эртараш лекте. Чыланат вургемым келыштарен чиеныт, нигӧм палаш ыш лий. Тыге ял калыкым Шорык-йол дене саламлышт. Кугурак тунемше-влак тиде пайремым сценарий почеш модын ончыктышт. Нунылан пайрем моткоч келшыш. Кайык нергенат ышт мондо. Нуным пукшаш кормушкым сакалышт, мӧҥгӧ гыч шӱраш пырчым конден шавышт. Ава-влак «Мыйын калык кочкышем» флешмобыш ушнышт. Нуно шуко тӱрлӧ кочышым ямдылышт. А 8-ше классыште тунемше Мария Илибаева перемечым ыштымыжым ончыктыш. Перемечше моткоч тамле ыле.
Теле каникул эртенат кайыш. Йоча-влак школыштат эртыше мероприятий-влак нерген кужу жап шыргыжал мутланышт.