Теҥыз флотышто служитлымем дене кугешнем!

Нефтекамск оласе нефтяной колледжым тунем лекмеке, Шочмо Эл ончылно порысым шукташ жап шуо. Уфасе воин частьыш миен шумеке, шем вургемым да ош фуражкым чийыше кок военнослужащийым ужна. Тиде Северный флотын флагманже - «Петр Великий» крейсерын - морякше-влак лийыныт улмаш. Нуно Краснознаменный Северный флотышто службым эрташлан командым погеныт.

Северный флот - тиде Российын флотшо-влак кокла гыч эн самырыкше. Тудым 1933 ий 1 июньышто Северный военный флотилий семын чумырымо. 1937 ий 11 майыште флотилийым Северный флотыш савырыме. Тӱҥ верланыме верышт - Североморск ЗАТО. Кызыт Северный флотын негызше - атомный ракетный да торпедный вӱдйымал пуш, ракетоносный да противолодочный авиаций, ракетный, авианесущий да противолодочный корабль-влак.

Тувел кундемын климатше ойыртемалтше: теҥызысе ночко юж, чӱчкыдын да вучыдымын вашталтше игече, полярный кече, тугаяк йӱд. Тидлан кӧра тушто службым эрташ шонышо рвезе-влак ончылно пеҥгыде йодмашым шындат. Мемнам эн кӱкшӧ «А» тӱшка (категория годности) дене ойырышт. Машинам виктарашлан «ВС» категорий улмымат тергышт. Флот - тиде корабль да вӱдйымал пуш веле огыл, серыштат войска-влак улыт. Тушко ракетно-артиллерийский вий да теҥызысе пехота пурат.

Северный флотын тӱҥ базыштыже - Североморскышто - водитель-влакым ямдылыме ешартыш курсым эртышым. Мыйым теҥыз пехотын 536-шо береговой ракетно-артиллерийский бригадышкыже колтышт, а мемнан частьна Оленья Губа поселкышто (Ончыч тудо верыште промысловый пӱчӧ кӱтӱ коштын.) верланен ыле.

Теҥыз пехотын девизше - «Кушто ме, тушто - сеҥымаш!» Кажне флотысо «морпехын» оҥай лӱмедышыже уло: Северный флот - «ош маска-влак», Тихоокеанский флот - «тигр-влак», Черноморский флот - «акула-влак», Балтий флот - «шем пантера-влак», Каспий флотилий - «пире-влак».

Мурманск областьыште климат поснак ойыртемалтше. Тушто, теҥыз воктен, йӱдшӧ-кечыже ночко, витарыше мардежан игече шога. Игече эре вашталтеш. Полярный кече-влакат шкешт нерген палдарат: йӱдым помыжалтме годым тиде ик шагат йӱд але куд шагат эр улмым умылаш ок лий. Телым поснак йӧсланена ыле - полярный йӱд айдемым эреак омыюа улшаным ышта. Телым пӱртӱс юзо моторлыкшым - йӱдвел сиянийым - пӧлекла.

Армий деч вара мый Нижневартовск олаш илаш куснышым. «Самотлорнефтегаз» АО-што нефть месторождений разработко пӧлкаште тӱҥ специалистлан ыштем. Шукерте огыл мый курык коклаште, неле геологий условийыште, нефтьым лукмо верым шымлыше магистрлан тунем лектым. Студент годсек калык куштымаш дене заниматлем, «Роснефть зажигает звезды» корпоративный фестивальыште кок гана сеҥышыш лектынам. Парашют спортышто шуаралташ жапым муам - тӱрлӧ парашют дене 15 гана тӧрштенам. Тыгак альпинизмым йӧратем (Кавказ курыкын эн кӱкшӧ точкышкыжо - Эльбрус курыкыш - кум гана кӱзенам.). Эше донор семын вӱрым сдатлем. Кызыт ик ий утла англичан йылмым тунемам. Тылеч посна мый ХМАО-н «Союз морских пехотинцев и морского спецназа» региональный мер организацийын пашашкыже чолган ушненам. Тиде ушем самырык тукымым патриотизм шӱлышеш ончен кушташ йӧным ышта, тыгак Афган ден Чечен республиклаште шке порысыштым шуктымо годым вуйыштым пыштыше рвезе-влакын ава-ачаштлан полышым пуа. Мый кажне ийын Сеҥымаш кечын олан уремлаштыже тиде ушем дене пырля пайрем марш дене ошкыл эртем. Тугодым эре теҥыз пехотышто службым эртыме годсо шӱч гай шем тӱсан военный формемым, беретым да тельняшкем чием. Морской пехотышто служитлымем дене кугешнем! Чыла моряк-влакым эртыше Морской пехотын кечыж дене саламлем!