Илалше-влакым саламлышт

Акпарс да У Тавлар яллаште илыше пенсионер-влак теният Акпарс школеш чумыргышт. Пайрем лӱмеш нунылан шокшо кочкышым ямдыленыт ыле. Землячкына, индивидуальный предприниматель Н.М. Давлетова тӱрлӧ сийым конден да эше пенсионер-влаклан «Чолман» газетлан возалтме квитанцийлам кучыктыш.

Кугурак ийготан еҥ-влак лӱмеш тиде кечын шуко поро мутым ойлышт. Акпарс ялсовет вуйлатыше Р.Г. Ягудин пайрем дене шокшын саламлыш да нунылан пеҥгыде тазалыкым, тыныс илышым тыланыш, пайремын спонсоржо Н.М. Давлетовалан кугу таум каласыш. Школ директор Г.Ф. Габдрахманова илышын кажне татше волгыдо лийже, тудым нигӧ ынже шӱлыкаҥде, чоныштым икшывыштын йӧратымашыже, уныкаштын шыргыжмыже куандарышт манын тыланыш.

Тӱвыра пӧрт пашаеҥ-влак, школышто тунемше да тунемаш каяш ямдылалтше изи икшыве-влак уна-влаклан изирак концертым ямдыленыт ыле: мурышт-куштышт, почеламутым сылнын каласкален пуышт, сценкым ончыктышт. Чолгарак пенсионер-влак Дина Габдрахманова ден Идылбика Султангареева шкештат муралтен колтышт.

Коча-кова-влаклан тунемше-влакын ямдылыме пӧлекым, пеледышым кучыктышт. Кум тукымым ушышо пайрем вашлиймаш чыла погынышын кумылжым нӧлтале. Тудым шарнен илаш манын, чылан пырля возалтыч.