Ушан сӧснаиге

Сӧснаигым, мешакыш пыштен, мотоциклын люлькешыже вераҥден, кечывалым йыр корно дене налын толна. Вӱташ олымым шарен, кочкыш-йӱышым шынден петырышна. Кас велеш паша гыч толын ончалмем годым сӧснаиге вӱташте ыле. Вольык кÿтÿ гыч толшаш годым уэш ончальым - уке! Оҥам пурын, рожым ыштен лектын каен. Пöртыштӧ кö ыле, чылан урем мучко кычал кайышна. Мылам Молодежный урем логале. Кöм ужым, йодыштын, урем мучашыш шуым. Ваштарешем, кас шӧрым лÿштен, доярка-влак пöртылыт. «Андреевна, мом йомдарышыч? Молан ӧрынат?» - йодыч. «Сöснаигым кычалам, лектын каен», - вашештышым. «Сöснаигет ушкал коштмо кеҥеж лагерь деке шуын. Кучаш тыршышна, да ышна керт. Чашкерыш пурен йомо». «Кушеч налда?» - йодо иктыже. «Тарасовка гыч». «Тура корно дене кондышда мо?» «Уке, йыр корно дене». «Сӧснада ожсо тура корно дене ошкылеш. Ынде тушеч иктат ок кошт, чашкер кугемын», - лие вашмут.

Мӧҥгӧ пöртыльым. Мотоциклым кожгатен, тура корно дене Тарасовкыш кудална. Миен шуаш 500-600 метр кодмо годым ончена - чара пасу дене, шÿртнен-шÿртнен, сӧснаигына ошкылеш. Ончыкыжо куржын миен чартышна. Йолжо гыч кучен, мешакыш пыштышна, мӧҥгӧ пöртылна. Тулеч вара ик вереат ыш кудал, ласкан илыш.

Март мучаште сӧс-наигына, капка воктенсе печын кум оҥажым шалатен, уэш лектын кайыш! Кышаж почеш ошкыльым. «Андреевна, лумышто мом тунар тӱткын ончет?» - ваштареш толшо Анна йодо. Ойгырен, сöснам лектын кудалме нерген каласкалышым. «Ава сöсна мо?» «Ава шол». «Ит ойгыро, сöснат мемнан дене. Мемнан сöснана - узо», - каласыш Анна. «Тендан денак шогыжо. Юмо пӱрен, игыла гын, ик игыже тылада лиеш! Налашат ом мий, тек шке пӧртылеш!» манын чеверласышым.

Эрлашыжым сӧсна пöртыльö. Августышто лу игым кондыш. Чылан илыше кодыч. Ик тылзаш лиймекышт, иктыжым Анналан пуышым, шымытшым ужалышым, кокытшым шкалан кодышым.

Икече кастене сöснам оралтыш луктым, кочкашыже пыштышым. Изиш лиймеке, ужатыме сöснаиге-влак иктын-иктын шкеак толаш тÿҥальыч. Толын пуратат, авашт деке кудалын мият. Тудыжо нуным нерже дене шÿкал-шÿкал колта, умшаж дене пурлын, рӱзалтен шола. Сӧснам верышкыже поктен пуртышна. Иге-влак омса воктене ятыр жап нюслен шогышт, вара вол воктек миен, оҥам нулкалаш тӱҥальыч…

Сӧснаиге-влак адак толыт манын, сöснам кок кече вÿта гыч ышна лук. Нунылан йот вÿта ÿпш шыҥен, сандене авашт, сырен, воктекыже намиен огыл. Тылеч вара сöснам еҥ деч ышна нал - шке ашнаш, игылыкташ тÿҥална.