Окса дене пӧртылаш шонен

Павай аптыранен огыл, капканым шындылын, опкын янлык-влакым кучаш пижын. Кӱчык жапыште коло чоло руалтенат шуктен. Мӱкшызӧ, янлыкым моштен ньыктын, коваштыжым сайын гына коштен.

Мӱй спас деч вара Исанбай павай, коваште-влакым мешакыш темен, Шараныш тарванен. «Ӓвий, мый таче окса дене пӧртылам», - шижтарен Емышбика пелашыжлан корныш лекме деч ончыч (ӓвий - Пошкырт кундемын касвелныже илыше илалше пӧръеҥ-влакын пелашыштлан ныжылгын пелештыме мутышт).

Заготконторын склад вуйлатышыже павайым ласкан вашлийын гынат, мешакыште мо улмым ужын, эсогыл тӱсшат вашталтын. «Шоҥго, вует уке мо? Ончо, мом ыштенат. Тиде янлыкым Йошкар книгаш пуртымо вет. Коваштым налын кодем гын, когыньнамат вуй гыч огыт ниялте: четлык коклаш огыт петыре гынат, кугу штрафым тӱлыктен кертыт. Тетла, тыгай паша дене вашалалтын, лӱметым ит амырте. Мый тылат мом темлен кертам? Тышке толын коштметым нигӧлан ит ойло. Коваштым тораштырак илыше шочшетлан але палыметлан иктаж шотым муын ужате», - манын склад вуйлатыше.