Сай вашталтыш лиеда

Шараҥге коремысе памаш ял деч ик километр тораштырак верланен. Тушко кажне кечын вӱдлан огыт кошт гынат, яллан пеш шерге улеш. Шоҥго-влакын ойлымышт гыч палена: корем гутлаште пашам ыштыше-влак памаш воктек каналташ, кечывал кочкышым ышташ, имньыштым кандараш, йӱкташ миеныт. Вийым поген, пашаш тарваныме годым иктаж атеш памаш вӱдым темен каеныт.

Социализм пагытыште тушто колхоз пашаеҥ-шамычлан кочкаш шолтеныт. Кеҥеж шокшышто техникым виктарыше механизатор-влак памаш воктене каналтеныт. Колхоз шаланымек, операторлан тыршыше Владимир Вайтиев памашым кертмыж семын ончаш тыршен. Тудын пенсийыш кайымыж деч вара монденыт, манаш лиеш. Могай дыр амал дене памашшинча йомын ыле, вӱд тӱрлӧ вер гыч йоген лектын. Кунам вынем оҥгым шындышт, трук памашшинча почылтын. Можо оҥай, тиде пашам шуктышо рвезе-влак ик ганат памашын тошто вержым ужын да куштырак лиймыжым пален огытыл. Кушан оҥгым шындышашым можо дыр шӱмыштлан кӱшыч каласен.

Памашын вӱдшӧ тамле, йӱмӧ веле шуэш, йошкынжо уке. Пагытыштыже мемнан кундемысе шофер да механизатор-влак тудым шкеныштын техникыштын радиаторыш оптеныт. Ик пагыт гыч радиаторышто петыралтше канал почылтын, температура койын иземын, техникын моторжо кужашрак пашам ыштен, ремонт умбакырак чакнен.

Ик гана тыгай экспериментым эртарышым. Кевытысе вӱд деч кодшо яра пластик кленчаш памаш вӱдым темен шындышым. Пӧртысӧ-влак уло кумылын йӱын пытарышт. «Могай вӱдым йӱда?» йодмемлан «Мензелинский» малдышт. Чынжым пален налмек, «А молан ме вӱдым оксала наледена?» маньыч. Тулеч вара памаш вӱдлан фляга дене коштына. Памаш дек волаш тошкалтышым да кучемым ыштыме, корем тӱр дене кок велне кӱчыкрак печым шогалтыме, каналташ теҥгылым шындыме. Верже пеш мотор.

Сентябрь тӱҥалтыште верысе администраций вуйлатыше, ялсовет пашаеҥ, моло погынышо-влак памашым почыч да «Яндар памаш» лӱмым пуаш пунчальыч. Мый ялсовет администраций вуйлатыше деч йодде шым чыте:

- Такияште илыше-влак, ял йыр шуко памаш уло гынат, молан лач тидыжым тӱзаташ шонен пыштеныт?

Э.Н. Гилязетдинова каласыш:

- Очыни, тиде памаш калыклан шерге, историйжым шарнен коднешт.

Памашым тӧрлымаште ял староста П.А. Васин пеш чот тыршен. Сваркым Г.Д. Шайтуков, моло пашам Г.В. Васильев ыштеныт.