Шӱкшак мешак

Ик кечын Калтаса селаш шӱжарем дек унала миен толаш погынышым. Корнышто машина дене кайыме годым пушеҥге але корно воктенак пӧрдалше шӱкшак мешак-влакым ончыштым. А кожла кӧргыш пурет гын, чыла вере ик сӱретым ужат - свалкымак почыныт мо! Чонлан пеш неле чучо. Тыгай мотор пӱртӱсым саклен огына мошто: кушан лиеш, тушан шӱкшакым кышкен кодена. Кызытсе саманыште тидлан лӱмын келыштарыме вер-влакат улытыс. Тидым чылан палат докан.

Миен шумек, шӱжаремлан шке ойгем луктын пыштышым, а тудо воштылал пелештыш: «Айда, лӱмын шӱкшакым кышкыме верым ончыктем. Мыйынат кок мешак наре погынен, ыҥгаеш намиен кудалтена». «Ну, йӧра, - шонем, - пагытем уло, машина - кидыште. Молан коштын толаш огыл?»

Кок мешак шӱкшакым машинаш пыштен, кудал колтышна. Кожла кӧргыштӧ лӱмын шӱкен, печылен налме верыш миен шуна. Тушто изи будко гай коеш, воктенже пий тыҥге-туҥге кудалыштеш. Ваштарешна, кугу тӧра гай оҥым кадыртен, орол лекте.

- Теве кок мешак шӱкым кондышна, пуртен кудалтена, - манам.

- Тушко шке машина дене пурымылан 300 теҥгем тӱлыман, - пелештыш кугурак йӱк дене саде тӧра гай койшо оролет.

- Теве тышан шынден коденат, шке нумал! - мыят тудын семынак йӱкым кугемдышым.

- А мыйын видеокамерем уло, тышан шынден кодеда гын, 500 теҥге штрафым тӱлыктат.

Кок мешак шӱкшакым нигуш чыкаш йӱдыген, мӧҥгеш савырнен кайышна.

Теве кузе улмаш! Иже умылышым, молан еҥ-влак шӱкшакым, кушан лиеш, тушан кышкен кодат. А вес семын ышташ ок лий ыле мо!? Мутлан, «Ик мешак шӱкым кондымылан 10 теҥгем тӱлена» манаш? Тунам нигуштат шӱк ок пӧрдал, чылан ойырымо верыш намиен кодат ыле докан. Шӱкшак дене пӱртӱсым огына амыртыл ыле!

А. НИКОЛАЕВА.