Чумаков… А чынже дене - Саитгареев

Ожно сайлымаш кече кугу пайрем семын эртен. Вич шагат деч вара кажне ял урем дене тереш але орваш кычкыме имньым колтеныт, кучыр пелен гармоньчым шынденыт. Пӱгеш сакыме оҥгыр йӱкеш помыжалтше калык, сурт сомылжым пытарен, сайлаш ошкылын. Участок-влак куд шагат эр гыч латик шагат кас марте ыштеныт. Йӱклымӧ деч вара еҥ-влак кевытыш вашкеныт. Тиде пайрем кечылан тушко лӱмын мом-гынат тамлыракым конден теменыт.

Ик тыгай сайлымаш годым Акпарс ялсоветыште комиссий председательлан фронтовик Давлет Саитгареевым шогалтеныт. Тудо ийлаште сайлыме бюллетень-влакым пелйӱд деч вара шотленыт, чыла документым, ямдылен, райрӱдыш коло уштыш торашке адакат тереш але орваш кычкыме имне дене намиен коденыт.

Пашажым мучашлен пӧртылшӧ Саитгареев колхоз правленийыш изиш каналташ пурен. Тиде жапыште правленийыш колхоз председатель Камай Шайхутдинов толын.

- Пӧртыл шуыч? Нойышыч дыр? Тыште мом шинчылтат? - йодын Саитгареев деч.

- Теве изиш каналтемат, Усолаш ошкылам.

- Тый тушко от ошкыл! Тыйым намиен кодат. Изиш вучалте! - манынат, колхоз вуйлатыше вашке гына лектын каен.

Ожно «Совет» колхозын имне вӱтаже правлений деч мӱндырнӧ огыл верланен ыле. Шайхутдинов имне вӱташ миен шуынат, кугурак конюхлан каласен: «Исмагилов, кызытак эн чапле кошопкашкет эн писе ожым кычкен шогалте да правленийыш волен шу. Тушто тыйым пеш кугу еҥ вучен шинча, тудым Усолаш намиен кодет.

- А кӧ вара тудо? - йодын конюх.

- Чумаков, шкеже, - вашештен колхоз вуйлатыше (Чумаков кодшо курым кыдалне кандаш ий партий Шаран райкомын икымше секретарьжылан тыршен).

Исмагилов кычкыме имньыж дене содор гына правленийыш миен шуын. Тушко пурен шогалын, но Чумаковым ужын огыл.

- А кушто Николай Михайлович? Мыланем вет тудым Усолаш намиен кодаш шӱдышт, - йодын кугурак конюх.

- Усолаш кайышыже тыште мый гына. Шайхутдинов мыланем имньым колташ сӧрыш, - пелештен Саитгареев.

- Тугеже, Давлет изай, тый Чумаков улат.

Правленийыште эше икмыняр еҥ лийын. Йӱклымаш пашан вуйлатышыжлан лӱм-нерым пижыктенат пуэныт.

Давлет Шамкеевич Саитгареевым, илыш дене чеверласымешкыжат, изижге-кугужге «Чумаков» маныт ыле. Эсогыл ик гана нылымше классыште тунемше ӱдыржат, Кугу Сеҥымаш кече дене саламлыме открыткыштыже ачажын чын фамилийжым ончыктен гынат, адресшым тыге чаткан возен шынден: Усола ял, Чумаков лӱмеш изурем. Сар ветеранын пӧртшӧ, чынакат, ял урем деч ӧрдыжтӧ, Шалтык эҥер воктен, верланен ыле.

А. АСМАЕВ.