Пӧлек

Шешке сад-пакчаште машина покрышка кӧргеш шошым пеледышым шынден. Пеледышын вондыжо кугу огыл. Ик жап гыч тудо моторын пеледалте. Воктечше эртен кайыме сайын сылне кушкылын пеледышыжым ужатат, ончен йывыртет.

Никита ден Максим уныкам-влак пеледыш воктеч иктаж шӱдӧ гана куржтал эртеныт дыр. Но ала шӱдӧ икымше гана куржын эртымышт годым саде пеледышым ужыныт вет. Пеледышым пӧлеклаш шонен пыштеныт, но кӧлан? Конешне, авалан. Мый «Пеледышым ида тӱкале» манынат шым шукто, ньога-влак, пеледышым кӱрлын, авашт дек пӧртыш куржыч. Мый, тыгайым ужын, умбакыже мо лиеш манын, почешышт ошкыльым. Йоча-влак пеледышым, икте гынат, аваштлан кучыктышт. Ава, пеледышым кидышкыже налын, эрге-влакым когыньыштымат ӧндалын, «Пеш кугу тау» малдале. Тиде пеледыш кушеч улмым умыла, но кузе лияш - вурсаш але мокталташ? Вет йоча-влак уло кумылышт дене авам куандараш шоненыт. Йочан аважым, ачажым йӧратымыже, пагалымыже, поро кумылжо чылалан келша. Тидым пеш сай койышлан шотлем, тугеже, мокталтыде огеш лий.

Ме ял мучаште илена, пакча шеҥгелне олык. Олык пеледме годым уныкам-влак, ик гана гына огыл тӱрлӧ пеледышым конден, аваштын кидыш кучыктеныт, пӧлекленыт. Южгунам ава шӱлыкан лиеш гынат, йочан кидше гыч налме изи пӧлекат кумылжым нӧлталеш.

Е. АПТУКОВ.