УЗИ-ш мийышым

Юалгырак пычкемыш пӧлемыш пурен шогалат. Вулно-резинке ончылсакышан врач, тугаяк неле йӱштӧ перчаткыж дене кок могыр ӧрдыжетым кучен, тыйым тӱрлӧ велым савыркален шымла, вара, йошкар тулым чӱктен, «Шӱм ден шодо-влак нормышто улыт» манын возымо кагазым кучыкта.

Витле ий ончыч электрокардиограммат уке ыле. Кызыт ЭКГ-н результатше пеленет ок лий гын, эн лишыл айдемыш савырнен шушо участковый терапевтат тый денет мутланаш ок тӱҥал.

Икана ренограммыш мияш логале. Медшӱжар вуем йыр ночко резинкым пӱтырал шындыш. Мый ала-мом пелешташ тӧчышым. «Мутланаш ок йӧрӧ, умшадам петырыза», - пеҥгыдын шижтарыш тудо. Шӱдымым шукташ вереште. «А ынде шинчадам кумыза да шып гына шинчыза», - манят, вес пӧлемыш лектын ошкыльо.

Магнитно-резонансный томографийым кызытеш райрӱдысӧ эмлымверыште эрташ ок лий, олашке корным кучыман. Учреждений персонал тыйым туге порын вашлиеш, пуйто лишыл родо-шочшыштак улат, лач ӧндал-шупшал гына огыт нал. Томограф воктек ӱжын пуртыштат, мыйжат содор гына тувыремым кудашаш пижым. «Кудашаш ок кӱл, вургемда денак вочса», - шыргыжалын пелештыш врач. Обследованийын результатшым вучымо жапыште печене, кампет дене шокшо чайым подылаш лиеш.

Вес гана врач УЗИ-м эрташ темлыш. Кугу ийготыш шуынам гынат, тумарте ик ганат УЗИ-м эртен омыл ыле. Врач УЗИ-ш каяш кагазым кучыктыш, паша графикше дене палдарыш.

Мӧҥгӧ пӧртыльымат, пелашем деч йодышташ пижым. Тудо шкеже УЗИ-м эртен, чыла пала. «Врач дек пурымо годым трусик марте кудашман але йӧршын чараматын кодман?» - йодам. «Миетат, палет», - торжан вашештыш тудо. Кас кочкыш жапыште адак тӱсен шым керт, йодын шындышым: «Тушто темдыштыт, перкалат, чывыштылыт але ниялткалат?» «Миетат, ужат», - пелештыш пелашем. Мый денем мутланаш кумылжак уке ыле, векат. Малаш вочмо деч вара пелашем трук каласыш: «Ойлаш монденам, пеленет шӱргышовычым налаш ит мондо». Теве адак омо ок тол. Шонкален кием. Шӱргышовычшо молан? Шкемым лыпландараш тыршем. Очыни, кабинетыште иктаж-мом тӧчыктаратат, стресс гыч лукташ душ йымаке шогалтат. Вара содор гына шӱргышовыч дене ӱштылтман лиеш. Черетысе пациент-влак, мыйын ночко могырем кошкымеш, вучен шинчаш тӱҥалыт мо?

Эрлашыжым УЗИ-м эртышым. Палыме врач ыле. Ласкан гына мутланен, приборжо дене пушкыдын ниялтыш. «Изиш вашталтыш-влак улыт, но тиде ийготланда кӧра. Мый гын нимогай лӱдыкшым ом уж. Шкендам аралыза, ида кылме. Режим дене илаш тыршыза. Таза лийза», - мане врач. Шӱргышовыч молан кӱлмымат пален нальым.

Икманаш, УЗИ пеш сай шарнымашым кодыш. Ынде врач-влак дек миемат, южгунам шоналтем: «Можыч, УЗИ-ш колтат. Пеш сай лиеш ыле». Уке. Ик врачат ок темле. Мыйым таза еҥлан шотлат дыр. Тидыже сай огыл мо?

А. АСМАЕВ.