Пограничник-влак дене вашлийна

И. Аймурзин да О. Искаков Карелийыште россий да финн чекым араленыт. Олегын тыршен служитлымыж нерген ачаж ден аважлан застава начальник тауштымо серышым колтен. С.Бикбаев, А. Яметов Владивосток воктенсе заставыште лийыныт. Станислав кум ий служитлен: пел ий срочный службым эртен, вара - контракт почеш. Застава начальник кызытат тудым шарна, Пограничникын кечыж дене йынгыртен саламла.

С. Аймурзин Амурск областьыште инженерно-сапёрный ротышто служитлен, чек воктене ачалыме сомылым шуктен, кӱртньывоштырым шупшын, меҥге-влакым шогалтылын. Э. Искаков Пянский погранотрядыште лийын, таджик-афган чекым арален. Шкеже тиде кечын пашаште ыле, тудын нерген 8 классыште тунемше Константин эргыже каласкалыш. Туштак, Таджикистаныште, Кулябский полкышто пулеметчик-контрактник Ю. Бикнязов служитлен. «Тунам тывечат-тувечат пеш чот лӱйкалат ыле. Пограничник-влаклан пеш шуко полышым пуышна», - ойлыш тудо. И. Пашкин Эстонийыште служитлен. Нуно Саарем отрошто РЛС станций дене вӱд акваторийым эскереныт. Кызыт шкеже ош тӱняште уке улеш. Тиде йолташнам порын шарналтышна. А. Байрамов Аргун пограничный заставыште лийын, ынде Россий армийыште служитла.

Пограничный войскаште служитлыше-влакым пайремышт дене ял староста А. Ахматгалин да клуб пашаеҥ В. Аймурзинан саламлымашкышт мыят ушнышым.

В. ИБУЛАЕВ.