Оҥай фотоснимкын историйже

Бокс дене таҥасымашке толшо уныкаж дене пырля Нефтекамскыш Караидель гыч Маргарита шӱжарем унала толын ыле. Шӱжарем дене фотоальбомым ончен, мутланен шинчышна. Кок фотоснимкыште марла вургем дене возалтше ӱдырамаш-влакым ужат, шӱжарем «Фотош войзалтшет-влак кушеч улыт?» манын йодо.

Мылам оҥай фотографийын историйже нерген келгынрак каласкалаш перныш: «Нине фото-влакым витлымше ийлаште ыштыме. Тунам ӱдыр-влак торфяникыште тыршеныт. Кугу сар деч вара калыклан илышым нӧлталаш кӱлын.

Пӧръеҥ-влак шагал кодыныт, техникат чыла вере ситен огыл. Ятыр пашам ӱдырамаш-влаклан ышташ пернен. Мый телым Караидель районыш чодыра пашам ышташ колхоз гыч пӧръеҥ-влак дене пырля самырык ӱдырамаш-влакым колтымым кызытат шарнем. Икмыняр ий Мишкан район гыч Свердловский областьыш торфяникыште пашам ышташ самырык ӱдырамаш-влакым «вербовщик» поген наҥгайыш. Мыйын Меҥалче Микайдарова кок шочмо акамат тушко ушныш. Уральский экономический районышто 2,7 миллион гектар шапаш торф лийын. Мийыше пашазе-влакым баракыш илаш пуртеныт. Чияшышт резинке кемым, рукавицым пуэныт. Торфым фрезероватлыше машина пӱчкеден каен. Ӱдырамаш-влак брикет-влакым кошкаш луктеденыт да кок кече гыч штабельыш оптеныт. Пашам кечыгут ышташ пернен. Неле лийын гынат, ӱдырамаш-влак планым теменыт. Тыршен ыштымыштлан премийым пуэныт, бригадылан куснылшо йошкар тистым кучыктеныт, фотом ыштен, нуным стендыш пижыктеныт. Ӱдырамаш-влаклан шкаланыштат пуэныт. Пашадар дене шукыжо шкаланже кевыт гыч чияшлан вургемым налын. Магазиныш лӱмын тасмам, ялукым, йолчиемым, костюмым, тулеч моло кӱлешан арверым намиеныт. Меҥалче акай мыланемат шаровар ден пинчакым налын конден. Ялыш пӧртылмеке, ӱдырамаш-влак шкаланышт, шочшыштлан тувырым да моло кӱлешым ургыктат ыле.

Кызытсе жапыште торфяникыште чыла пашам машина намия. Нине фотокартычке-влакым ончен, ожнысо илышым шарналтышна. Фотошто возалтше Меҥалче акайлан колхозышто пашам сайын ыштымыжлан Кугу сар годым «За победу над Германией в Великой Отечественной войне 1941-1945 г.г.» да «Ветеран труда» медаль-влакым пуышт. Дмитрий Янгубаев курскай дене кок эргым куштышт. Дмитрий ден Эрик коктынат кӱлешан образованийым нальыч. Пашам ыштат, ешыште икшывыштым куштат, коча лийыныт».

Н. ИРГУБАЕВ.

Снимкыште: Шола гыч: Маруся Шамыкова, Меҥалче Микайдарова, Маша Пасетова.