Шашке упш

Илыше еҥлан чыла кӱлеш. Тыге меат икана мом дыр налаш кугу олаш лектын кудална. Ик кевытым коштын савырнышна, весым - кӱлеш арвер уке. Корно воктене «Чылажат - суртлан» манме универсальный кевытым ужнат, «Ынде тыште мо кӱлешым налынак лектына дыр» манын, тушко пурышна. Но адакат арам улмаш. Ужалыше ӱдырлан мом кычалмынам ойлышнат, тудо мемнам аэропорт корнӱмбалне верланыше ужалыме комплексыш туныктен колтыш.

Кычал муна. Пеш кугу кевыт улмаш - йолташетым йомдарет гын, йыле гына отат му. Коштын-коштын, кечывал кочкыш жап шуо. Ужалыме комплексын ик лукшо гыч пеш тутло пуш толеш. Еҥ-влакат, вашкен-вашкен, тувелке ошкылыт. Меат, «Кечывал кочкышым ыштен лектына» манын, калык почеш тарванышна. Ончылнына кокай ден павай «Макдоналдс», «Блинная», «Закусочная» манме вывеске-влакым пелейӱкын лудын ошкылыт. Шижалтеш, ял гыч мийыше улыт. Павай, «Айда, аваже, тыште кочкына» манын, «Макдоналдс» воктек миен шогале. «Чынак, палыме шуэш, мом пукшат? Кочкын ончаш кӱлеш. Ожнырак тыгай мутым колынат огынал», - келшыш кокай.

Павай поднос тич кочкышым кондыш. Ӱстел коклаш верланышт. Шоҥгыеҥ пачаш-пачаш чиен. Тыге кочкаш йӧсыракат, курткыжым пӱкен вуеш кудаш сакыш. Упшыжым кызытсе жаплан келыштарыме стойкын ик яшлыкышкыже шӱкале. Йылгыжше шем шашке упш кылт гына пуренат кайыш.

Павай, шинчын, тамлын гына кочкаш тӱҥале. Тыгодым ик мотор ӱдыр саде яшлыкыш кодшо кочкышым конденат оптале (тушто кодшо кочкышым кышкаш йӧнештарыме вер улмаш).

- Балам, там же моя норковая шапка! - кычкырале павай.

- Бабай, там же шапки нет, отходы! - пелештыш ӱдыр.

Павай, тарванен, топсаште (петляште) кечыше калай капкасым шӱкале, упш уке - бачокышто кия. Упшыжым налын лукто, а тудын ончалшаш вержат кодын огыл - лавырген пытен. Ситыдымыжлан ӱдырын кышкалме кодшо кочкыш лачак упш кӧргыш возын. Пийлан луктын нулыкташ огеш лий вет. Мом ышташ? Пакетым налын, упшым пыштен, кокай ден павай, ӱчашен-ӱчашен, олмышт гыч кожганен кайышт.

В. ГАЛЕЕВ.