Пиал - икте-весе дене кылым кучен илымаште

Мый Балтач район Йыванай ялыште илыше скрипач Миншакир Минилкаевич Минилкаев улам. «Чолман» газетын ешыжым, а эше, газет дене пайдаланен, тудын гоч чыла марий-влакымат У идалык дене саламлем, кужу ӱмыран, пиалан лияш да поснак журналист пашаштыда у сеҥымашыш шуаш тыланем. «Чолманым» 20 ий утла налын шогем, тудым пагалем да кажне статьяжым уло кумылын лудам, кажне арнян толын шумыжым вучен илем. 1948-1952 ийлаште Краснокам районысо Эльян селаште верланыше педучилищыште тунемынам. Тунам кызытсе Нефтекамск ола лийын огыл, тудын олмыштыжо верланыше Касево селан пасушкыжо пареҥгым лукташ, шурно кылтам погаш коштынна. Педучилище деч вара 40 ий туныктымо пашаште тыршенам, 1992 ийыште сулен налме канышыш лектынам. Кызыт тазалыкемлан ом ӧпкеле, тыландат, ончычсо пасу олмышто кушкын шогалше олаште марла газетым шочыктышо да калыкнам чумыр вийыш ушен шогышо журналист-влаклан, таза-эсен лияш тыланен кодам.