«Газетланна ӱшанле кодса»

Теве адак ик идалык эртен кайыш. Мо аламаже лийын гын, тек, мондалтын, тошто иеш кодеш. Мый ынде 43 ий руш ялыште илем, но шочмо йылмына дене лекше шергакан «Чолман» газетнам налам, йӧратен лудам, эше руш пелашемлан кусарен пуэм, кертмем семын возашат тыршем. Тыршымемым аклен, мылам кодший «Ший пера» конкурсышто сеҥымемлан пӧлекым да дипломым кучыктышт. Пеш кугу тау, тидыжым мондаш лиеш мо? Марий-влак, теат шкенан марла газетланна возалтса, лудса, шкендан шонымыдам возыза.

Редакций пашаеҥ-влакым, лудшына-влакым У ий дене шокшын саламлем. Илышыштыда пеҥгыде тазалыкым, пиалым, ӱшанле йӧратымашым, икте-весым умылымашым тыланем. Пашаштыда у сеҥымашыш шуза, серыш мешакда эре тич лийже, газетлан возалтше-влак ий еда ешаралт шогышт. Кузе пий озажлан ӱшанле, меат тугай ӱшаным йомдарышаш огынал.

Уло поро чонем дене тыланымем илышыштыда, ешыштыда, пашаштыда, лыве гай пӧрдын волышо ош лум гай волгалтын, чондам куандарыже. У ий дене, у вий дене!

Поро тыланымаш дене тендам пагалыше Анна Демьяновна АРТАМОНОВА.