Пырля ошкылаш тыланена!

Ты жапыште эскерен шуктенам: «Чолманым» налше-влак газетым огыт кудалте, тугак подпискым ыштен шогат. Нуно тыгак ойлат: тендан газетдан лудшылан келшыше, тудын ӱшанжым шуктышо  рӱдыжӧ ок йом. Мардежан, пургыжан, йӱран игече годым ик могырч весыш кадыргыл шогышо кушкыл огыл, а виян, пеҥгыдын шоген кертше пушеҥге гай улыда. Саман кеч-кузе вашталт толеш гынат, те негызым пыштыме корныда гыч огыда кораҥ, ончычсо гаяк, ала-кӧлан йӧраш тӧчен огыл, а шкендан профессийлан ӱшанле улмым саклен, калыкын чон йодмыжым шуктен ошкылыда. Поро пашам ыштеда, газетда пеш кӱлешан. Кокла да кугурак ийготан-влаклан веле огыл. Ӧрдыжтӧ илыше самырык-влакат каныш кечын ялыш пӧртылмышт годым садак «Чолманым» кучен шинчыт да лудыт. 

Садлан тӱҥалме пашадам умбакыжат шуйыза, ида кудалте! Газет мыланна икте-весым ушен шогышо  кыл гай кӱлеш. У ийыште у вий дене ушнен, чылалан ончык пырля ошкылаш тыланем!