Кужу ӱмыран лий, марий мер толкын!

Тыгай кугу мероприятийым Марий национально-культурный автономийын Мишкан районысо председательже, Мишкан агропромышленный колледжын директоржо, РФ да БР образованийын отличникше В.Т. Байбулатов шке колледжыштыже устан организоватлен.

Собранийыште пешат шуко выступлений, темлы-маш-влак лийыныт. Мероприятийым В.Т. Байбулатов шке выступленийже дене тӱҥалын. ИКЦ-н пашажым тудын тӱҥ специалистше А.В. Ибулаев иктешлен.

С.С. Новиков кумалтыш верым аралыме, тӱзатыме нерген ойлен, тыгак марий рвезе тукымым кӱлеш семын туныктымо йодышым тарватен. Р.К. Ялаева тӱҥ шотышто марий йылмым арален кодымо нерген тургыжланымашыжым мыланна намиен шукташ тыршен, тыгай погынымашым чӱчкыдынрак эртараш тыланен, Г.А. Саймулукова марий калыкын ситыдымашыже-влакым палемден, Чорай ялсовет да школ пелен шуко мероприятийым эртарыме нерген каласен.

Собранийыш Балтач, Бирск, Бурай, Дӧртыльӧ, Караидель, Нуриман районла гыч марий автономийын еҥже-влак толыныт. Нуриман районысо Кугу Шеде ялын марий калыкын этнокультурный рӱдержым вуйлатышыже Я.С. Калимуллина пеш сайын выступатлен. Тудо марий калыкын илышыжым, тыгак кидпашажым (тасмам куымаш, йыдалым тодмаш, тӱрлымаш да молат) кумдан ончыкташ кӱлмӧ нерген ойлен, марий книга дене кылдалтше проблемым тарватен, марий йоча-влак шочмо йылме дене шонышаш, марла кутырышаш улмым палемден.

Кажне район гыч мийыше мер пашаеҥ верыште шуктымо пашаже нерген ойлен, а нуно, каласен кодаш кӱлеш, ятыр улыт. А.В. Камилянов, Маядык ялсовет вуйлатыше, кумалтыш нерген да школлаште марий книга укелык йодышым тарватен. В.А. Сабиров, Бирск районын представительже, шке районысо паша радамым иктешлен. Погынымаште тыгак Балтач район гыч Д.М. Захаров, Караидель район гыч И.Н. Ипулаев, Бурай район гыч А.М. Мухаматдинов выступатленыт.

Вашлиймашыш Уфа ола гыч республикысе тӱҥ историй да тӱвыра рӱдерын вуйлатышыже Ф.Ф. Ямалетдинов толын ыле. Тудо республикысе ИКЦ-влакын пашашт нерген каласкален.