Верысе инициативылан полышым пуымо программым - илышыш

Тений ты программа почеш Йывангасолаште мом ыштен кертме нерген 15 октябрьыште мутланышна. Тунам калык ялысе тӱвыра пӧртым ачалаш ойым ыштен ыле.

18 октябрьыште ППМИ программым илышыш шыҥдарыме шотышто эше ик гана каҥашышна. Калык рӱж погыныш, район гыч представитель-влак тольыч. Погынымашнам мурымаш-куштымаш дене почна. Тудын вашеш йоча-влак дене «Клубна могай лийшаш?» сӱрет да сочинений конкурс-влакым эртарышна. Пашаштым фойесе стендеш вераҥдышна.

Район администраций вуйлатышын алмаштышыже, финанс пӧлка вуйлатыше Ч.С. Хайбрахманова верысе инициативылан полышым пуымо программа нерген уэш радамлен каласкалыш. Ялсовет вуйлатыше К.К. Зайнакаева тудын негызеш тылеч ончыч школ, йочасад, шӱгарла йырым печен налме нерген ойлыш, чыла ыштыме сомыл проектор полшымо дене шинча ончылно сӱретлалте. Тыгак Йывангасола ялсоветыште эше мом ышташ лийме шотышто умыландарыш, калык деч 2019 ийыште тиде программыш ушнаш кумылышт да могай проблемым решатлаш темлымышт нерген йодо.

Библиотекарь Э.В. Гаврилова да клуб вуйлатыше Л.В. Алынбекова тӱвыра пӧртыштӧ окнам, омсам, кӱварым алмашташ, зрительный залыште, фойеште, пӧлемлаште пырдыжым да потолокым, библиотека кӧргым чиялташ кӱлмӧ шотышто ойлышт. П.П. Сайранов йоча-влаклан репетицийлан воштончышан зал, пу станок кӱлмӧ нерген каласыш.

Калык тиде ойым йӧплыш. Чылан клубым олмыкташ келшышт. Йывангасола ялсоветыште вич яллан ик клуб гына уло. Верысе инициативылан полышым пуымо программыш логалына гын, библиотекым да клубым ачалена ыле - нуно ик зданийыште верланеныт.

Л. АЛЫНБЕКОВА.

НЕФТЕКАМСК ОЛАШТЕ

Нефтекамск ола округысо 5-ше йочасад муниципальный дошкольный образовательный автономный учрежденийнат верысе инициативылан полышым пуымо программыш логалнеже. 9 октябрьыште дошкольный организацийын спорт залыштыже ППМИ шотышто каҥашыме погынымашым эртарышна. Тушко 114 еҥ миен ыле. Тачысе кечылан «5-ше йочасад МДОАУ-н кудывечыштыже асфальтым да спорт площадкым тӱзатымаш» проектым эн кӱлешанлан шотлымо.

Иктешлыме погынымашыш 16 октябрьыште чумыргышна. Программа полшымо дене йочасадыш наҥгайыше корнына чаракан гыч оҥай путешествийыш вӱдышӧ йолгорныш савырна, йол йымак ончен ошкылмо олмеш ача-ава да икшыве-влак икте-весышт дене ласкан мутланен ошкыл кертыт манын ӱшанена.

М. САТЫЛБАЕВА.