Изи музей - кугу паша

Чыла тидым шотыш налын, энтузиаст да усталык пашалан мастар-влак М.П. Кутлусатовын, Наталья ден Рудольф Мишенькинмытын да нунылан полшаш кумылын ушнышо верысе активист-влакын тыршымышт дене марий этнографический музейым ыштеныт. Вержылан ФАП пеленсе зданийын яра пӧлемжым ойырен налыныт.

Экспонат-влакым чумырен шуктымеке, 7 июньышто музейым почмо пайремышке ятыр унам - тӱвыра, мер, районысо администраций пашаеҥ, БашГУ-н Бирск оласе филиалжын преподавательже-влакым ӱжыныт.

Ялсовет администрацийым вуйлатыше Р.Т. Хасанов, музейым ыштымаште чолган тыршыше-влак дене палымым ыштышыла, нунылан тауштымо мутым ойлыш. Михаил Кутлусатовын, верысе туныктышо да художник Ефрем Калимьяновын мастарлык пашашт да уна-влакын пӧлекышт тиде кечынак музейыште верым муыч. У верыш пурымо йӱлам Бирск район администраций вуйлыкын алмаштышыже Д.Г. Тухбатуллин да М.П.Кутлусатов шуктышт - йошкар тасмам пӱчмеке, чыла еҥым тоштерысе поянлыкым ончалаш ӱжыч.

Кӱлешан пашам иктешлыме лӱмеш погынышо калыклан клубышто Кужнур да Курмызак ялласе ӱдырамаш-влакын мурышо, школышто тунемше ӱдыр-влакын куштышо ансамбльышт шке мастарлыкыштым ончыктышт.

И. ГУБАЕВ.