Келге шарнымаш - Сеҥымашлан эн кугу ак

Жап гоч ончалме годым Сеҥымаш кече кажне ийын утыр тораштырак кодмыла чучеш гынат, пайремже ок шоҥгем. Нефтекамскыште 9 Май кечын, кечывалым рӱдӧ площадьысе парад гыч тӱҥалын, кас марте Комсомольский проспектысе скверлаште да парклаште пайрем шӱлыш озаланыш. Кечывалым рӱдӧ паркыште каныше-влак оласе тӱвыра учреждений-влакын коллективыштын ямдылыме концертым ончен кертыныт, а национально-культурный рӱдер-влакын самодеятельный коллективышт Бизнес-рӱдер ончылно шкешотан «флешмобым» эртарышт. Марла мурен куштымаш, мутат уке, чыла калыклан келша, садлан пайрем годым, иктаж-кушто марий куштымаш семым тарватыше гармонь йӱкым колыт гын, чылан тушко чумыргат. Ты гана оласе

36-шо йочасадын «Вис-вис» фольклор ансамбльжын да оласе марий-влакын самодеятельный концертышкышт Калтаса район Келтей ялысе культура пӧртын коллектившын толмыжо Сеҥымаш пайремым эше чотрак ямландарыш. А кастене культура да каныш паркын кугу сценыштыже тӱвыра аланыште тыршыше профессиональный коллектив-влакын концертышкышт оласе «Шӱдыргорно» ӱдырамаш вокальный ансамбль ушныш.

Сеҥымаш пайрем пелйӱдым салют дене мучашлалте.

И. ГУБАЕВ.

Снимкыште: Келтей тӱвыра пӧртын коллективше.