Чапым аралаш тыршен ыштышылан ӱшанат

Кеч-могай улан да ток илыш огеш лий гынат, духовный кочкыш деч посна садак ала-мо ок сите гай чучеш. Чонышто лайык лийже манын, эше ямым муын да тудым шке йырет шарен мошташ кӱлеш. Пашам ыштыме, тунемме да тулеч моло сомыл коклаште шканет сем, сылнымут да искусство тӱняште пычырик гынат верым муын моштет гын, Айдеме лӱметым сандалыкыште арамлан от нумал, шонем. Тидланак, очыни, кажне ийын районлаште да олалаште художественный самодеятельность мастарлыкым ончыктымо конкурсым эртарат.

Шукерте огыл Нефтекамск оласе предприятий да организаций-влак гыч самодеятельный артист-влак филармонийыште шке вийыштым тергышт. Вокал, хореографический композиций, тӱрлӧ семӱзгар дене шоктен моштымаш, мутмастар (художественное слово) да моло жанр денат пашазе коллектив гыч сценыш лекше еҥ-влакым ончен, ӧрыктарен кертшыжымат ужат - исполнительский кӱкшыт дене южиктыже профессиональный артист-влак дечат вараш огеш код.

Жюрилан - куштылго огыл паша (Мастар деч мастаржым чылан талын выступатлыме годым кузе ойырен налаш?), конкурсант-влаклан - уло вийым, кумылым почын ончыкташ тыршыме чон вургыжмо тат, а ончаш толшо-влаклан - пеш чапле концерт.

Тыгай пайрем идалыклан ик гана лиеш.

Мурен-куштымаш номинацийыште марий койыш-шоктышым, шӱм-чон поянлык ден моторлыкым 36-шо йочасадысе воспитатель-влакын ӱдырамаш ансамбльышт ончыктыш. Нунын мастарлыкыштым жюри кокымшо степенян диплом дене палемдыш. Тыгай воспитатель-влакын тыршымышт марий шӱлышым паша ыштыме верыштышт гына огыл, олаштат арален кодаш полша.

И. ГУБАЕВ.