Ончыкылык куд ияш корным калык ойырен налын

Ончычсо дене таҥастарымаште, тений РФ Президентым сайлаш мийыше-влакын чотышт шукырак лийын, эл мучко 67,47 процентыш шуын. Нефтекамскыште, мутлан, 18 мартыште 15 шагатлан сайлыме южо участкыште 60 утла процент сайлыше шке йӱкшым пуаш миен ыле. Тиде кечын сайлыме верлаште юридический консультацийым налаш, верысе депутат-влак дене вашлияш да кӱлешан йодышым каҥашаш лийын. Образований да тӱвыра учрежденийлаште концертым, кином, тӱрлӧ мастер-классым ончыктеныт, специалист-влакын полышыштым темленыт, ярмиҥга ден оҥай выставкылаште пайрем шӱлыш озаланен.

Башкортостаныште сайлаш йӧрышӧ ийготан калык гыч 75,45 процентше тиде кечын йӱкшым пуэн. Сайлымаш почеш иктешлымаш гыч рашемдыме: В. Путинлан 77,65%, П. Грудининлан 12,09%, В. Жириновскийлан 5,03%, К. Собчаклан 1,26% йӱкленыт, моло кандидат-влак ик процент деч шагал йӱкым погеныт. Эл кӱкшытыштӧ В. Путинлан 76,69%, П. Грудининлан 11,77%, В. Жириновскийлан 5,65%, К. Собчаклан 1,68%, Г. Явлинскийлан 1,05%, Б. Титовлан 0,76%, М. Сурайкинлан 0,68%, С. Бабуринлан 0,65% йӱкым пуэныт.

И. ГУБАЕВ.

Снимкыште: Нефтекамскысе 489-ше сайлыме участкыште.