Шочмо йылмын кечыже - келшымаш пайрем гай

Ӱжмӧ уна-влак коклаште Нефтекамск ола администрацийын тӱвыра пӧлка вуйлатышын пашажым шуктышо Г.Д. Кашфиева, журналист, верысе поэт А. Буторин, Нефтекамск педколледжын директоржо Р.А. Гареев да молат ыльыч. Вашлиймашым шке вийышт дене Нефтекамск педколледжын студентше да туныктышыжо-влак ямдыленыт. Вӱдышат, артистат шкеак ыльыч. Тиде кыдалаш профессиональный образованийым пуышо учрежденийыште тӱрлӧ калык гыч лекше самырык ӱдыр-рвезе-влак тунемыт. Нуно шке йӱлаштым, йылмыштым моткоч жаплат да пагалат, шочмо тӱвырашт дене кугешнат. Тидым студент-влак пайремыште моткоч сылнын да тичмашын почын ончыктышт. Ончаш мийыше уна-влакым нуно рушла «Девчата» муро, совла дене шоктымо мастарлык, татарла, башкирла лывыргын кушталтымышт дене куандарышт. А удмурт калык гыч лекше самырык тукым весела да оҥай «Йыдал» калык модышым ончыктыш. Студент-влакын пайрем вургемыштат келшыше ыле - калык вургем дене нуно моткоч сӧралын койыч. Шкештат тидлан нимыняр вожылын, ӧрын ышт шого. Самырык улыт гынат, кугезе-влак деч куснен толшо родо-тукым кыл шижмашышт чоныштышт ила. Шочмо калыкын тӱвыраж деке шӱман улмышт нунын кугешнен мурымо-куштымо кумылышт гыч раш шижалте.

Пайремыште марла мурымым да куштымымат ужаш лийын. «Ит ойгыро, самырык ӱдыр» мурым ныжыл кумыл дене педколледжын кокымшо курсыштыжо тунемше Краснокам район Корий ял ӱдыр В. Пазюкова йоҥгалтарыш. Тудо педколледжыште тӱҥалтыш класслаште йоча-влакым туныкташ ямдылалтеш. Моло концерт номерыштат чолгалыкше дене ойыртемалте. Марла хореографий постановкым куштышо дуэт - В. Аликаева ден И. Платова - мастарын ончыктышт. Валерия «Марла пешыжак ом мошто, но садак умылем. Туймаза ола гыч улам, Нефтекамскыш тунемаш толынам» манын палемдыш.

Шочмо йылме пайрем Башкортостан Республикыште илыше тӱрлӧ калыкын койыш-шоктыш ойыртемжым, йылме, тӱвыра поянлыкшым кумдан почын ончыктыш да чынжымак келшымаш фестивальыш савырныш.

Л. ШАВАЛИЕВА.

Снимкыште: Педколледжын студентше-влак келшымаш мурыш ушненыт.