Ӱярня - телым ужатыме пайрем

Уфа олаште начар тазалыкан икшыве-влаклан телым ужатыме пайремым эртареныт. Весела Ӱярням нунылан Рима Баталован «Калыкын самырык жапше» региональный мер фондшо да инвалид икшыве-влаклан иппотерапий рӱдер пӧлекленыт. Икшыве-влакым аниматор-влак модыктеныт. Ӱдыр-рвезе-влак муро конкурсышто мастарлыкыштым шуареныт, хороводым пӧрдыныт, имне спектакльым да файер-шоум онченыт. Пайремым эртарымашке «Тазалыклан - имне деке» социально значимый проектат ушнен. «Ме идалык мучко тӱрлӧ спорт мероприятийым эртараш палемденна. Тиде проектлан таче стартым пуымо. Но эн тӱҥжӧ - «Тазалыклан - имне деке» программа инвалид икшыве-влаклан реабилитаций шотышто чот полшышаш», - палемден РФ Кугыжаныш Думын депутатше Рима Баталова (снимкыште покшелне).

Л. ГРИГОРЬЕВА.

Снимкыште: Пайремыште чылалан оҥай лийын.

О. Яровиковын фотожо.