+12 °С
Облачно
Мастар-влак
3 Декабря 2025, 09:30
Москваште нефть отрасльын эн сай пашаеҥже-влакым суапландареныт
Октябрь тылзыште Уфаште «Роснефть» компанийын дочерний предприятийлаштыже тыршыше пашаеҥ-влак коклаште «Профессийыштыже эн сай» XX Всероссийский мастарлык конкурсым эртареныт. Тудын финалыштыже элысе компанийын кундемлаштыже верланыше 82 предприятийже гыч 550 утла пашаеҥ таҥасен. Сеҥыше-влакым «Нефтегазодобыча», «Нефтепереработка и нефтехимия», «Нефтепродуктообеспечение» направлений-влакын тӱрлӧ номинацийлаштыже ойыреныт. Мастарлык конкурсын сеҥышыже-влакым 24-25 ноябрьыште Москваште суапландареныт. Тугодымак тушто НК «Роснефть» ПАО-н самырык специалистше-влакын регион-влак кокласе XX научно-технический конференцийышт эртен.
Всероссийский конкурсыш «Башнефть Добыча» ООО-н республикысе йыжыҥыштыже сеҥышыш лекше пашаеҥже-влакат ушненыт да тиде ганат ойырен налме профессийыштышт сай специалист улмыштым пеҥгыдемденыт.
Башкортостанын командыже «Электромонтер по обслуживанию и ремонту электрооборудования сетевого хозяйства» номинацийыште сеҥымаш тошкалтыште 1-ше верым айлен. Тӱрлӧ калыкын шочшыжо коклаште электрик-влакын командыштышт Калтаса район Тошто Яш ялын эргыже Леонид Изибаеват мастарлыкшым шуарен. Тудо конкурсышто келге шинчымаш ден моштымашым ончыктен. Марий электромонтёрым моло дене пырля пашазе профессий-влакын «Безопасный труд» номинацийыштыже сай лектышыш шушо специалист семынат палемденыт.
Л. Изибаев Москваште награждений годым. Еш архив гыч налме фото-влак.
Леонид Павлович «Башнефть» компанийын Краснохолмский селасе участкыштыже (КЦНГ №5) электриклан тырша, чумыр паша стажше латкандаш ийыш погынен. «Конкурсын программыже теорий да кум практический ужаш гыч шогыш. Теорий ужашыште 60 йодышлан вашешташ кӱлын. Практический ужашыже «Башнефть» компанийын Уфа оласе Демский районышто верланыше производственный площадкылаштыже эртыш. Тушто паша моштымаш дене кылдалтше тӱрлӧ заданийым минутлан, шагатлан шукташ кӱлын. Тыгай кӱкшӧ лектышыш шуаш мылам чот тыршаш, кужу жап ямдылалташ, шагал огыл вий-куатым пышташ логале. Кеҥеж гоч кум тылзе утла рӱдолаш ямдылалташ коштым. Тыгак чимарий йӱлам шуктымем, Юмылан ӱшанымашем, марий калыкын эргыже семын, пӱртӱс дене чак улмо кылнам шижын, умылен шогымем мылам кугу вийым ешарышт», - каласкалыш тудо. Л. Изибаевым да Башкортостанын командыжым сеҥымаш дене шокшын саламлена да ончыкыжат у кӱкшытыш шуаш тыланена.
Новости партнеров
