«ChEVER» брендан чием

Кызытсе илышыште тиде шижмашым вес семынракат палдараш лиеш. Тыге шочмо кундемыште, йӧратыме Кугу Келтей ялыштына илыше Д.Е. Линючева «ChEVER» марий брендым ышташ да шке проектше гоч марий калыкым уло чонжо дене йӧратымыжым ончыкташ шонен пыштен. Тыгай кумылжо эше ӱмаштак лийын, но тудым тений июньышто гына илышыш шыҥдарен шуктен, молан манаш гын тӱҥ пашаже весе - тудо англичан йылмым туныктышо улеш, а эше еш да сурт кокласе сомыл пагытым налыт.

Ончыч шонымаш лийын, вара сӱрет, умбакыже - творческий тат да вара гына брендын лӱмжӧ да ямде арвер. Теве пайремлан заказ почеш марий тувырым тӱрлат да ургат, а тыглай кечын чияш келшыше вургем лийын огыл. Садлан Дарья Евгеньевна вигак носки ден футболко нерген шоналтен. 

Чевер коробкаш шым носким пыштыме. Кажне кечын вес носким чияш лиеш, а тушто кече-влакат сералтыныт - «Шочмо», «Кушкыжмо», «Вӱргече», «Изарня», «Кугарня», «Шуматкече», «Рушарня». Тыгак марий орнамент дене сӧрастарыме ош, шем да йошкар тӱсан носки наборат уло. «Мариечка» да «Чевер» манын возымо ош футболкат пеш моторын коеш.

Кызыт ӱдырамаш носки ден футболкым маркетплейсыштат налаш лиеш. Лишыл жапыште марий палан носким, лонгсливым (кужу шокшан футболкым) да молымат колташ шона.

Ӧрдыж гыч ончымаште тыгай проектым куштылгын да пеш вашке гына ышташ лиймыла чучеш. Но илышыште вигак тыге миен огеш лек. Чылажат тореш кайыме, «Кӧлан тиде кӱлеш?» манын, тӱҥалме пашам кудалташ шонымо тат-влакат лийыныт. Но чынжым гын, тиде шукылан кӱлеш: мыланна, марий калыклан, кушкын толшо тукымлан, вет нуно мемнан деч примерым налыт. А Дарья Евгеньевналан усталык сеҥымашым да ончыкыжат у проект-влакым шонен муаш да илышыш шыҥдараш тыланена.