Кӱчым сӧрастарымашат моштымашым йодеш

Уфа олаште илыше Надежда ГАЛАНОВА (Шаран район Янахматыште шочын-кушкын) кандашымше ий кӱчым ыштыме сервисын мастержылан тырша - ӱдырамаш-влаклан тӱжвал тӱсыштым сылнештараш полша. Тудо гель-лак дене чиялтылеш, кӱчлан маникюрым ышта, «эстетический педикюр» манмымат устан ворандарен мошта. А эше тудо кӱчыштӧ… сӱретла, тудлан тӱрлӧ-тӱрлӧ дизайным келыштара. Сӱретлымаш - Надеждан чонжылан поснак лишыл сомыл, вет тудо образований дене изобразительный искусство ден черченийым, тыгак тӱҥалтыш класслаште туныктышо улеш. Благовещенск педагогика колледж деч вара рӱдоласе 111-ше гимназийыште ныл ий изобразительный искусствым туныктен, йоча-влакым творчествылан, йырысе моторлыкым ужын мошташ шӱмаҥден. Тӱҥ паша коклаште кӱчым ыштылше мастер семынат шуаралташ тӱҥалын - тӱрлӧ курсышто тунемын, тиде сферым лишкырак шымлен. А кызыт тудо тӱрыснек кӱч сервисын мастержылан тырша, эше «Vesna Beauty professional» компанийын бренд-инструкторжо улеш. Ондак мӧҥгыштыжӧ пашам ыштен гын, кызыт шкенжын салонжым почаш ямдылалтеш.  

Тиде мотор, поро кумылан марий ӱдыр тӱрлӧ конкурслаште мастарлыкшым шуара, шинчымашыжым келгемда. Кум ий почела маникюрым, кӱчлан дизайным, моделированийым ыштыме тӱнямбал чемпионатыште сеҥышыш лектын.   

«Ончыч кагазыште, холстышто сӱретленам гын, ынде кӱчыштӧ сӱретлем. Маникюр ден педикюрым ыштыше мастер дек коштшо моткоч шуко, тыгай услуго таче, рушла каласаш гын, пешат востребованный. Пытартыш жапыште клиент-влак пашам чаткан да сайын, тыгодым писын шуктымым аклат, кӱчыштӧ сӱретлен моштымымат шотыш налыт. Кӱчлан наращиванийым могай йӧн дене ыштышашым мастер клиент дене пырля каҥашен ойыра. Но, кеч-могай йӧн дене ыштыме гынат, тудын дене кок-кум арня веле коштман, молан манаш гын кӱч кушкеш. Кӱчым аралыман, тудын пластиныже пешат пластичный. Чытыш, шкем кучен моштымаш, кӧргӧ вий, пашам йӧратымаш мылам тудым ответственно ышташ полшат. Жапыштыже шукташ манын, пашам йӱдшӧ-кечыже ышташ ямде улам», - ойла Надежда Владиковна.