Уста кидыште паша шолеш

Айдемын мастарлыкше нерген пален налмеке, тудын дене эре мутланымет гына шуэш. Чоным куандарыше пашажым ужын, кумылет  ылыжеш. Шаран район Акпарс ялыште лачшымак тыгай уста еҥ, тӱрлӧ ыштыш-кучышлан чолга, шӧртньӧ кидан пӧръеҥ Р.Р. Габдуллин ила.

Роман Радикович «Тидым ыштен ом мошто» манме шомакым йӧршынат ок пале. Суткаште шагат эше шукырак лиеш гын, шонымашыжым утларакат шуктен кертеш ыле дыр. Суртыштыжо, пӧрт кӧргыштыжӧ ала-момат ыштен гынат, ончыкылык шонымашыже волгыдо дечат волгыдо. Суртоза мыланем эшеат кугурак шонымашыжым луктын каласыш - тудо у пӧртым нӧлташ кермычым налын ямдылен.

Роман Габдуллин Акпарс ялыштак шочын-кушкын. Верысе школысо 9-ше класс деч вара Шаран селаште 148-ше СПТУ-м тунем лектын, водитель, тракторист, чумыр чоҥымо пашан мастерже, электросварщик профессий-влакым налын. Илышыште пеш кӱлешан специалист улеш. Училище деч вара кок ий армийыште Орел да Тула олалаште служитлен, водитель да автомеханик лийын. Армий деч вара тӱрлӧ вере пашам ышташ верештын, шуко ий автосервисыште тыршен. Кум ий «Закир» КФХ озанлыкыште трактористат, водителят лийын, пудыргышо техникымат олмыктен.

«Илыш йыжыҥан, маныт. Нелылыкымат ужаш пернен, йоҥылышымат шуко  ыштылынам. Эртак еҥлан пашам ыштен гына ончык каяш ок лий. Ала-молан чон эре шочмо верыш шупшын. Юмылан тау, кӱлеш жапыште шкемым кидыш налын кертынам», - шке илыш корныж дене палдара кидмастар. 

Кок ий ончыч Роман ача-аважын пӧртшӧ воктен йоча площадкым ыштен шынден. Кеҥежым ялыш коча-коваж дек тӱрлӧ олала гыч шуко йоча канаш толеш. Уремыште машина-влак кудалыштыт, а изи ньога-влаклан модаш вер уке. Алена шӱжаржынат кум икшывыже эре Роман воктен пӧрдыныт, садлан йоча-влаклан посна модмо вер лийже ыле манын шонен. 

«Эн ончыч пӧрт воктене изирак лӱҥгалтышым ыштен сакышым, йӱр деч авыралташ оҥа дене вуйжымат леведым, а вара тушко моло йоча-влакат толаш тӱҥальыч, да воктекыже оҥа дене эше ик лӱҥгалтышым ыштышым. Модашышт ошмам конден оптышым, сӧралрак лийже манын, пальмым ыштен шогалтышым. Тыштак шинчын каналташышт олымбал ден ӱстелым вераҥдышым. Йырже тошто орава-влак дене авырен нальым. Ончыч трактор дене кудалыштме годым мый тошто орава-влакым эре поген оптем ыле. Жап эртымеке, теве нуно молан кӱлеш лийыч. Кеҥежым йоча-влак тыште моткоч шукын погынат», - каласкала Роман.

Йырымваш моторлыкым ыштымаш, иктаж-мом оҥайым шонен лукмаш Романын хоббишкыже савырнен. Площадкысе оборудованийым кузе моштен чиялтымыжым  ончен куанет!

Романын ешыж дене Акпарсыште илымыжлан тений 5 ий лиеш. Ача-аважын пӧртшӧ ваштарешак ялыште кок пӧлеман тоштырак пӧртым налыныт. Кызыт тудым олмыктеныт, пӧрт кӧргыштӧ шокшо, ару. Сурт оралтыжым тӱрыснек пужен вашталташ верештын. Олмыктымо паша тачысе кечынат пытен огыл. Роман тений кеҥежым урем могырыш профнастил дене печым вашталтен, кугу, мотор узоран капкам ыштен шогалтен. Магазин гыч материалым веле налыныт, моло пашажым суртоза чыла шке шуктен.

Романын тӱҥ пашаже - машина-влакым олмыктымаш. Ачажын гаражыштыже автосервис гай мастерскойым почын. Пашажым официально ышта, самозанятыйлан шотлалтеш. Роман дек Шаран район гыч гына огыл, Туймаза, Октябрьский  олала гычат пудыргышо техникыштым кондат. Мийымем годым вич машинан озашт черетым вучат ыле. Романын мо сомылым шуктымыжым ончаш лекме годым гараж воктек ик машина толын шогале. Озаже машинаже мо лиймым ончалаш йодо. Техник-механик капотым веле почо, вигак амалжым каласыш. «Вот да!» - шоналтен, ӧрын ончен шогышым. Роман автомобильыште изирак уто-ситым гына огыл, двигатель йотке ачален мошта. Запчастьым кычалын огеш кошт, магазин гоч заказ дене кондыкта.

Еш пиалжымат Роман мӱндырнӧ кычалын огыл. Пошкудо Пекшаул ял гыч Анжела лӱман марий ӱдырым марлан налын. Анжела ялысе «Дюна» кевытыште пашам ышта. Вате-марий лу ий пырля илат, ӱдырышт школышто тунемеш. Анжелан аважат нунын дене пырля ила. Роман ден Анжела, кугу оксам кычалын, мӱндыркӧ каен огытыл. Пашам йӧратет гын, чыла вереат сай илаш лиеш.

Роман гай мастар кидан еҥ-влакын шонен моштымыштлан ӧраш гына кодеш. Уло кумыл дене ыштыме пашаже тек ончыкыжат куаным конда.