Йодшыланат тӱрлен пуа

Анжелика Георгиевна - кидпашаштыже шке корным кычалше творческий шӱлышан тӱрлызӧ. Ыштылме арверже-влакым ончалын, вигак чаткалыкым йӧратымыже, чылажымат кумыл пыштен ямдылымыже шижалтеш.

«Мый кидпаша дене шинчылташ йӧратем. Име да крючок дене пидам, гладь да ырес дене тӱрлен моштем. Садлан ожно годсо йӧн дене (шӱртым шотлен) тӱрлаш тӱҥалаш нимынярат йӧсӧ огыл ыле. Но, жапым йомдарыде, чылажымат писын гына ушештараш манын, землячкынан, Йошкар-Олаште илыше уста марий тӱрлызӧ Надежда Акиеван ямдылыме курсшылан эҥертышым.

Южо еҥ ончыч тӱрла да вара вургемым урга. А мылам гын ончыч ургаш да вара ямде тувыреш тӱрлаш келша. Чылажымат шкеак ыштен мошташ манын, лӱмын вургемым ургаш да моделироватлаш туныктымо курсыш коштым. 

Урген-тӱрлен пуаш йодшо-влак лийме годым кап-кылыштым вискален колташ йодам да, фотографийыштым ужын, мутланен, тиде еҥлан могай узор утларак келшышашым, могайрак вургем дене чаткарак койшашыжым шижаш да кап-кылжылан лач гына келыштараш тыршем. Тыгай годым шкемын аклен моштымашем, интуиций пеш чот полшат. Мый дечем шукыж годым Бирск, Мишкан районлаште илыше-влак марий тувырым урген пуаш йодыт. Южгодым тӱрлаш тӱҥалме деч ончыч шкештат висаш толын каят. А икана Йӱдвелне илыше ӱдырамаш шке илыме верыштыже лӱмын ургыктымо ямде тувырым тӱрлаш колтен ыле. 

Кызыт марий ӱдырамаш-влак габардиным пеш «пагалат», а мыланем «шӱлышӧ» куэм келша. «Кандырам» пунаш, рашкалтарен кушташ йӧратыше-влаклан лач тыгайым ойырен налман манын шонем», - каласкала Анжелика.   

А. Янситова Бирск олаште социальный пашаеҥлан ышта. Кызыт тудо 11 илалше еҥын социальный заказшым шукта. Шкеже профессийже дене физкультур туныктышо улеш, Чайковский олаште профессионально-педагогический колледжым тунем лектын, кызыт эше, паша деч кӱрылтде, Бирск медико-фармацевтический колледжыште шинчымашым пога. А пыртак яра жапше лектеш гын, куэмым, имым кидыш налеш да мотор тӱрым тӱрла. Теве тыге, мемнан мастар, пашаче тӱрлызына-влакын тыршымышт дене кугезына-влак деч куснышо тӱвыра поянлыкна, у семын волгалтын, вияҥын, шушаш тукым-влак деке кусна.