«Кидпаша деч посна иленат ом керт…»

«Йоча жапыште курчак-влакым чиктенам: нунылан вургемым тӱрленам. Кӱшыл Яшыште (У Яш - авт.) Аймалче акай икана Реж ола гыч рончымо шӱртӧ-влакым шуко конден ыле. Школыш каен омыл ыле эше, иктаж шым ияш лийынам. Лач тунам Меҥай акай мыйым икымше гана тасмаште шӱртӧ дене «пӱшкылаш» туныктен ончыктыш… Эше, шарнем, ачам ик идалык Альшей районысо Шафран селаште ветеринарлан тунеме.

Толмыж годым пеленже мулине шӱртым конден ыле. Ме, ӱдыржӧ-влак, тунар йывыртенна! Кумшо классыште тунеммем годым туныктышына Зоя Борисовна Тимиряева мыланем сарафаным урген пуыш. Тудым шкеак тӱрлышым… Кидпашам дене кылдалтше эше оҥай илыш савыртышым ушештарыде ок лий. Школышто пырля тунемме рвезе икана «Тӱрлӧ-тӱрлӧ, тиде тӱрлыметым вес гана суртыштына койкеш сакена», - мыскарам ыштен пелештыш. Мо оҥайже, илен-толын, чынак тыгела лекте! Келшымына годым тудлан мый эше, вожылалын, колъялукым тӱрлен пӧлекленам», - каласкала  латкум ий сулен налме канышыште улшо туныктышо. 

Е.М. Нафикова Благовещенск педучилищыште, Йошкар-Оласе Н.К. Крупская лӱмеш Марий кугыжаныш пединститутын филологий факультетыштыже тунемын. Ӱмыржӧ мучко Тошто Яш школышто марий йылмым да литературым туныктен, завучланат ыштен. Тугодымат я сомыл коклаште, я кастене кидпашаже нерген монден огыл - школ пашамат ыштен, тӱрлашат етшен. Кызытат суртыштыжо яра ок шинче: родо-шочшыжлан пӧлек шотеш, ялыште йодшо-влаклан але иктаж пайремлан, юбилейлан сӧрал шовычым тӱрлен пӧлекла. Оҥай схемым верештмеке, тудым вигак, сӱретлыдеак тӱрла.

Журнал, интернет, мотор пакет гычат узорым ончен келыштара. Екатерина Мингареевна тыгак марла тувырым, кӱпчыкӱмбалым урген тӱрла, оҥеш сакыме, вуйым сӧрастарыме арвер-влакым ыштылеш. Тыгай украшенийже-влак тудын тӱрлӧ-тӱрлӧ - кажне тувырлан келшыше. Нуным концертлаште кучылтеш, вет тудо ятыр ий ялысе «Кумыл» ансамбльыште мура. Тынар ийыште ургымо-тӱрлымӧ материалжат шагал огыл погынен. «Кидыш мо логалеш, пашалан чыла кучылтам. Ӱдырем-влакат кондат. Кидпаша деч посна иленат ом керт», - шыргыжал ойла усталык шӱлышан ӱдырамаш. 

Пагалыме туныктышын коллекцийыштыже марий калыкын тӱвыра поянлыкшым аралыше веле огыл, республикынан историй лаштыкше дене кылдалтше арверат шке вержым муын. Екатерина Мингареевна 2007 ийыште кундемнан 1557 ийыште Руш кугыжанышыш ушнымыжлан 450 ийым темыме лӱмгечыжлан мындерӱмбалым тӱрлен! Тиде изи кӱпчык тений августышто Башкортостанын рӱдолажым «ужын толын» - Уфан юбилейжылан пӧлеклыме выставкым сӧрастарен.