Шӧртньӧ кидыштыже пу пашкар «илана»

Василий Яшпаевич тыгай ойыртемалтше кидпашаже-влак дене палымыже-влакым пешат ӧрыктарен. «Тиде мыйын чон йодмо сомыл. Пу гыч изинек тӱрлӧ арверым ыштылаш келшен. Тунам кертмем семын ушаҥам, ишкым, йытырым ворандаренам», - ойла Василий. Но тыгай усталык шӱлышыжӧ, конешне, яра верыште шочын огыл. Ачаже, Яшпай Яншаевич Кутлуметов, уста столяр да плотник лийын. Лач тудын деч мастарлыкше эргыж декат куснен, очыни. Пу гыч сурт-оралтыште кӱлешан арверым - садыште шинчын каналташ ӱстелан теҥгылым, тошкалтышым, оҥам пӱчкеден, «монча» манын возымо оҥай табличкым, молымат - Василий чыла шке ворандара. Материалым наледа, кошта, пу арверым утларакшым пӱнчӧ, тумо, писте, шопке гыч ямдыла. Пытартыш жапыште тудо мебельым йӧнештараш тӱҥалын! Шке кид дене ыштыме кровать, пушкыдо пӱкен, дермантин дене шупшмо мотор пуфик, мешак сынан кресло (шке урген), йоча пӧлемыш шкаф - суртыштыжо кажныже шке вержым айла. Кроватьым гын кевытыште модылан келшен толшыжым эскерен, ик-кок кече проектым ыштен, черчений урокым шарналтен да… тыршымыже арам лийын огыл: кроватьше кевытысе дечат чаплырак миен лектын. Нине чатка паша-влакым ужын, йолташыже, родо-шочшыжо, палыдыме еҥжат чӱчкыдын ыштен пуаш йодыт. Тӱҥ пашаж деч вара, яра жапым муын, Василий Яшпаевич кажнын кумылжым шукташак тырша. 

А пашаже тудын тыршыме тӱвыра полатыште ситышын. Стерлитамак оласе Башкир республикысе тӱвыра техникумышто (кызыт Башкир республикысе тӱвыра да сымыктыш колледж) театрализованный представлений-влакым ямдылыше режиссер-постановщиклан тунем лекмеке, тудо латвизымше ий Мишкан селасе тӱвыра полатыште тырша, кызыт художественный вуйлатышылан ышта. 

«Кунам тыгай талантем почылто? Кевытыште ужалыме мебельын акшым ужмо деч вара! - воштылеш Василий. - Тугодым мый ачамын молан туныктымыжым шарналташ шонен пыштышым да пашалан пижым. Но тиде сомыл сай ӱзгар деч посна ок воране, садлан сай инструмент-влакым налаш логале». Талантан еҥ тудо талантанак, очыни. Василий Яшпаевичын моло сомылланат: кеч металлын сваркыже, кеч кермычым опташ - кидше мия. Кызыт ешыж дене илыме кермыч пӧртымат шке кидше дене чоҥен шогалтен. Тек шӧртньӧ кидше ончыкыжат лишыл да йырысе еҥ-влакым куандара, усталыкше вияҥеш да тукым гыч тукымыш кусна.