Мотор тортым кӱэштеш

Икана социал кылыште тӱрлӧ лаштыкым ончен шинчымыж годым оҥай кондитерский сайтым верештын. Сылне сӱрет-влакым ужын, тудынат тыгайым ыштымыже шуын колтен. Ондак кӱэшташ, вара моторын сӧрастараш туныктымо онлайн курс-влакым эртен. А варажым Бирск олаштак мастер-классыште шинчымашыжым пойдарен. Тыге кондитер-влак радамыш логалын.

«Мый чонемлан келшыше пашам муынам, - ойла Виктория Геннадьевна. - Нимогай йӧсылыкым ом шиж, молан манаш гын кызыт шуко тӱрлӧ кевыт уло, ик вере мо кӱлешым от верешт гын, весыш кычал кает». «Тендан деч утларакше могай тортым ышташ йодыт?» манмемлан тыге вашештыш: «Ме чылан тӱрлӧ улына. Икте сакырым шагалрак пышташ йодеш, весылан кӱкшӧ, а южыштлан сӧрастарыдыме торт келша. Мый кажнын кумылжым шукташ тыршем».

Кызыт Виктория еҥ-влакын йодмышт почеш тӱрлӧ пайремлан тортым, капкейк-влакым кӱэштеш. Тек ончыкыжат кидше лывырге, шке илышыжат торт семынак «сакыран» лийже.