Тӱрым тӱрлаш уста улыт

Тӱр калыкнан усталыкшым, чон поянлыкшым почын ончыкта. Ожно тӱрым тӱрлымаш ик эн кугу пашалан шотлалтын. «Тӱр тӱрлаш - йыдал тодаш огыл», - маныныт марий-влак.

Тиде касыш тӱрлызӧ-влак Мария Гареева, Ольга Ишпахтина, Мария Захарова, Ирина Каншаева, Любовь Шуматбаева, Любовь Янике-ева, Любовь Ишпахтина толыныт ыле. Нуно пеленышт шке кидпашаштымат: тӱрлымӧ тувырым, кӱпчыкӱмбалым, ӱстембалшовычым, салфеткым, сӱретым - конденыт.

Ме, кугурак-влак, ожно кужу теле кечын ӱдыр-влак, ик пӧртыштӧ погынен, лампе тул дене шӱдырымӧ, пидме, тӱрлымӧ, могай шӱртӧ да орнамент дене тӱрлымӧ нерген каласкалышна. Вӱдышӧ-влак С. Валиева да Л. Иванаева кунам марий тӱр шочмо, мо дене тӱрлымӧ, сӱрет-влак могай шонымашым почын пуымо, тӱс-влакын значенийышт нерген ойлышт. Варажым кидпаша нерген марий калык туштым туштышна, тӱрым тӱрлышна, мурышна, куштышна. Нерге библиотекын пашаеҥже Л. Иванаева тӱр нерген книга выставкым ямдылен ыле. С. Яникеева марий модыш-влак дене модыктыш. Касым В. Колумбын марий тӱр нерген возымо  почеламутшо дене мучашлышна.