Пашажым ончен куанет

Пашам ыштыме ийлаште жапын кузе писын эртен кайымыжым шижаш ок лий. Ончыч икшывым куштет, вара уныка-влакым кугемдаш полшет. Нунышт кугемыт да шке корнышт дене ошкылыт: тунемаш пурат, пашам ышташ тӱҥалыт. А тый йокрокланет, толмыштым, коча-ковам куандарымыштым вучет.

Мыйын шонымаште, йокрокланен илыше илалше еҥ шагал вашлиялтеш. Чылан кертмышт семын мом-гынат ыштылыт: пакчаштым моторландарат, сурт-оралтым тӱзатат, тазалыкыштым текшырат, спорт дене кылым кучат, клубышко мураш погынат, кид-пашаланат жапым муыт.

Теве Г.Ш. Минилбаеват (снимкыште) яра жапшым пайдалын эртара. Мыйын мийыме годымат, ручкам кучен, кроссвордым решатлен шинча ыле. 

Галина Шуматбаевна - шуко икшыван ава. Колхозышто, школышто техничкылан пашам ыштен. Сулен налме канышыш лекмек, шукырак жапшым творчествылан, кидпашалан ойыра. Оралтыш пурымо годымак тыште могай кидмастар илымым ужат. Тидым, конешне, шкетынак ышташ огеш лий - марийжым, икшывыже-влакым полышкалаш йодын. Сад-пакчаштыже тӱрлӧ фигурым, мотор йыраҥ-влакым келыштарен. Могай материал гыч ыштыме, шонеда? Пластик шиша-влак гыч. Кӧ дыр тудым шӱкшакыш кудалта, а Галина пеледыш йыраҥым ыштылын. Тӱрлӧ тӱсан пробка-влак дене пырдыжеш мозаика семын кайык, янлык фигур-влакым «сӱретлен шынден». 

Пӧрт кӧргыш пурет да адакат кидмастарын пашаже-влакым ужат. Кагаз лаштык гыч ыштыме тӱрлӧ «оригами»: пеледыш, йӱксӧ, янлык - оҥайын койыт.

Галина Шуматбаевна пидашат уста. Тӱрлӧ узор да форма дене пидме йыргешке палас-влак диваным, креслым сӧрастарат.

Чынжымак, кидпашам йӧратыше ӱдырамашын тыршымыже палынак коеш. Пашажым ончен куанет. Галиналан тазалыкым да пӱсӧ шинчаончалтышым тыланен кодына.