«Вӱр дене мия дыр шол…»

«Кеч-могай ӱдырым кидпашалан ава шӱмаҥда. Мемнамат шукыжлан авана туныктен», - ойла Энна Борисовна. Тудо Байбулатовмыт ешыште кушшо кум ӱдыр гыч кокымшыжо. Тудымат аваже изинек крючок да име дене пидаш, тӱрлаш туныктен. Эннан мутшо гыч, утларакше Эля акажлан тӱрлаш келша, тудо пеш мастарын да шыман тӱрла. А шкеже 2010 ийыште такиям ыштен ончаш шонен пыштен - Неля шӱжаржылан марий йӱла почеш марлан лекташ лачак такия кӱлын. Вара согам урген ончен. Ондак родо-шочшыжо-влаклан гына ыштылын гын, ынде йодшо-влакын кумылыштымат шукта.

Икана мӧҥгыштыжӧ урген шинчымыж годым ялысе шоҥгыеҥ миен пуренат, мом ыштымыжым ужын пелештен: «Тыйын кугезе коватат такия-сога-влакым урген вет, вӱр дене мия дыр шол…»

9-ше школышто библиотекарьлан ыштыше Э.Б. Игнаевалан такия ден сога-влакым ыштылаш гына огыл, шымлашат келша. Кызыт шӱшерын историйжым, ожно кована-шамыч кузе ыштымым, мом кучылтмым рашемдынеже.

Чынак, суртышто сомыл ятыр лийын гынат, кугезына-влак кидпашаланат жапым муыныт. А кызыт илыш вашталт толеш. Ожнысо вургемым тоштерыште гына ужаш лиеш. Да шукышт тошто вургемым, тӱрлӧ арверым, ок кӱл манын, луктын шуат. А южышт, Энна гае еҥышт, мӧҥгешла, тоштыеҥ-влакын пашаштым аклен, уэмдаш тыршат да мемнан икшывына-влаклан сай примерым ончыктат.