Кеч-могай сомылжат ворана

«Мыйын ачам шке пашаштыже пеш сай специалист улеш. Еҥ-влакын йодмо почеш мотор деч мотор окнасерга-влакым, ялыште илыше ӱдырамаш-влаклан вынем гыч вӱдым нумалаш шуко вӱдварам ыштен. Мӱкшотарлан омартам, раме-влакым ямдылен. Жап эртымек, коҥгам опташ тунемын. 

Ачамлан воштыр дене корзинкам тодаш пеш келша, вет илыш вашталтын гынат, тудо озанлыкыште эре кӱлешан. Интернетыште видеом ончен, моло арверымат тодаш кумылаҥын. Кызытсе жаплан мо келшен толмым эре эскерен, мом йодмым шотыш налынак шога: телым омартам ышта гын, шошым воштыр гыч тӱрлӧ арверым тодеш, а кеҥежым эше иктаж-мом шонен муэш. Яра жапыштыже колым эҥыраш йӧрата, Тӧргым воктек лектын шинчеш», - ойла Светлана ӱдыржӧ.