Тӱрлызӧ

Яра жапыште кидпашам ыштен: пидын, шукыж годым тӱрлен. «Мылам изинекак пеш оҥай чучын, кузе тыге тӱрлӧ шӱртӧ дене моткоч шыман да моторын тӱрлаш лиеш? Эре авамын воктенже шинченам да шке семынем тунемаш тыршенам. Икымше пашамым кызытат шарнем - тиде ал тӱсан ончылшовыч лийын. Мый тунам 7 классыште тунемынам. А вара умбакыжат тӱрленам да тӱрленам,» - каласкала Олеся Владимировна, шочмо ялысе школыштыжо технологий урокым туныктышо.

А яра жапыштыже тугак тӱрым тӱрлаш йӧрата. «Кызытсе йоча-влак кидпаша дене шуэн шинчылтыт, компьютер, телефон, планшет нунылан утларак келшат. Но тӱрлӧ йӧным муын, изинекак йоча-влакым кидпашалан шӱмаҥдаш тыршена, шке йырышт моторлыкым ужын, ӱмырешлан кидпаша мастарлык дене таҥлалтыт,»- ӱшанен ойла Олеся Владимировна.