Илышыжым мурылан пӧлеклен…

Гуля Шамшутдинова (кызыт Ермолина) ямле Ушмен ялеш шочын, тыштак ила. Пырля тунемме йолташыже-влакын ойлымышт гыч палена: изинек чолга да весела койыш-шоктыш дене ойыртемалтын, тыршен тунемын, тӱҥалме пашажым мучаш марте шуктен. Школышто тунеммыж годымак мураш-кушташ йӧратен, садланак, очыни, Йошкар-Олаште сымыктыш училищым сайын тунем пытарымек, шочмо ялышкыже шке калыкшым куандараш пӧртылын. Гулян сылнын йоҥгалтарыме мурыжо-влакым, оҥайын эртарыме пайремлажым шотленат от пытаре. Чылашкыжат уло чонжым пышта.

Кодшо ий мучаште Гуля Ермолина ден «Таныптӱр сем» фольклор ансамбльын вуйлатышыже Ольга Бакирова Коян МСДК-ан йоҥгыдо полатыштыже моткоч оҥай «Ковайын шондыкшо» мероприятийым эртарышт. Тиде марий касыш тынар марий еҥ толеш манын, шоненат омыл ыле. Школ гыч мыят 7-ше класс тунемшем-влакым ончаш намийышым. 

Вӱдышӧ-влак ожнысо марий вургем нерген каласкаленыт, чиен ончыктеныт. Гуля Ермолина марий касым моткоч оҥайын вӱден, тӱрлӧ конкурсым, ожнысо марий модышым ямдылен. Пайремым весела «Таныптӱр сем» ансамбль сӧрастарен. Тунемшем-влаклан марий мероприятий келшен, шукышт мӧҥгышт шарнаш кодшо пӧлек дене пӧртылыныт. Тиде касыште, марий семым колмек, йол шкежак тавалташ луктын! Мыйын шонымаште, тиде пайрем погынышо чыла калыкын кумылжым нӧлталын!

Гуля Анатольевналан кугу таум каласыме шуэш! Тудо марий калыкын кумылжым савырен мошта, арамлан огыл погымо ансамбльжат «Яндар йӱк» маналтеш. Тушто чынжымак яндар йӱкан, марий кумылан, калыкнан тӱвыражым пагалыше еҥ-влак мурат.