Шокшо портышкемже чонымат ырыкта

Ялыште илыше-влак Михаилын портышкемжым куанен чият, вет шке ыштыме портышкем кӱжгӧ да шокшо лиеш. Адакшым портышкем мастар пашажым чон пыштенак шукта, тидыже айдемын йолжым гына огыл, чонжымат ырыкта.

Михаил шуко йочан ешыште шочын-кушкын. Портышкемым ышташ ачаж деч тунемын. Нунын дек портышкем ыштыкташ Пӱрӧ да Мишкан районла гыч шукын коштыныт.

«Пашат уло, межат уло, но межым лӱлаш нигушто, - азапланенрак ойла Михаил, - а тылеч посна портышкемат огеш воч».

Тыгай сомыллан жап кӱлеш, воктенет умылышо да полышкалыше еҥ лиеш гын, пашажат вашкерак кая. Михаил ден Иринат икте-весым умылен, пагален илат. Нуно кум икшывым ончен куштеныт. Ынде уныкашт ден икшывыштлан шке усталыкыштым пӧлеклат.