Натальян курчак тӱняже

Натальян Нефтекамск олаште шочын-кушмыжым пален налмек, марий ӱдыр дене лудшына-влакымат лишкырак палдараш шонымаш шочо. Ӱдыр оласе 2-шо кыдалаш школым тунем лекме деч вара Нефтекамск педколледжыште историй туныктышылан тунемын, а вара университетыште ты специальность денак кӱшыл шинчымашым налын. Тулеч вара Йӱдвелыш илаш куснен. Шке мутшо гыч, декрет отпускышто улмо пагытыште чонжылан келшыше сомылланат жапым муаш тыршен: ырес дене тӱрлен, пейзажым сӱретлылын, а курчак ыштылше мастар-влакын пашаштым ужмек, шкенжынат тыгайымак урген ончымыжо шуын колтен.

Теве ынде иктаж идалык наре Наталья изи курчак-влакым ыштылеш. Ончыч трикотаж куэм гыч кап-кыл ужаш-влакым урга, синтепун дене темен, ваш-ваш ушкала. Вара вургемым ямдылаш пижеш. Натуральный куэмла - хлопок але трикотаж гыч - тувырым, комбинезоным, юбкым але молым шулын урга. Ончычрак коваште але замш гыч изи-изи йолчиемымат шкеак ыштылын, ындыже ямдым наледа. Курчак вургемым мотор полдыш, тасма, чылдар, моло кырча-марча дене сӧрастара. Вара лӱмын налме синтетика тресс гыч ӱпым келыштара да шке пидме упшым упшалтен шогалта. Ик-кок кечыште коло кандаш сантиметр кӱкшытан, шке шоген моштышо изи ӱдырым але эргым «куштенат шукта».

Наталья кажне курчакшым йӧратен ыштылеш. Могай тудо лийшашым южгунам шкежат вигак каласен огеш керт докан. Чылажат чонышто могай кумыл озаланыме дене кылдалтын. Кунамже яндар, кунамже пастельный тӱсанрак вургемым чиктен шогалта, заказ почеш ыштыме годым ончыкылык модыш оза-влакын кумылыштымат пален налаш тырша. Кызыт ты мастарын интерьерный курчакше-влак Сургутышто, Уфаште, Москваште, Йошкар-Олаште, Краснодар крайыште, Ростов областьыште да шуко моло вере «илат». Шукерте огыл кокытшо Испанийыш «корным кучен». «Ты сомыл чонемлан моткоч келша. Тӱҥжӧ - ешем кумылем нӧлтал мошта. А йолташем да палыдыме еҥ-влакын пашам-влакым куанен ончымышт, мокталтымышт умбакыжат мастарлыкым шуараш таратат», - манеш Наталья.