Ий кугыжаныш

Пытартыш ийлаште у идалыкым вашлияш ямдылалтме годым ял калыкат оласе-влак деч вараш огеш код: уремыште кожым сӧрастарен шогалтат, лум гыч Йӱштӧ кугызам да Лумӱдырым, идалыклан келшыше янлык-влакым ыштылыт, йоча-влаклан келанен мунчалташ курыкымат келыштарат.

Южо еҥын фантазийже эшеат поянрак, кузе тугайым шонен луктын манын, ӧраш гына кодеш. Теве, мутлан, Мишкан район Пӱнчер ялыште илыше Кутлубаевмытын суртышт воктен изирак ий кугыжанышым ужна. У ийым вашлияш сӧрастарыме пӱнчӧ воктен чоҥен шогалтыме ий теҥгылеш шинчын каналташ (снимкыште) да тудым аралыше пий-влакым ниялташат лиеш. Тораштырак кугу ӱстел, 2018 цифр да айдеме-влак койыт.

Суртоза, Владимир Сайпашевич, Бирскыште пашам ышта. Йӧным муын, ий «кермыч-влакымат» тушечак шупшыктен да шонымыжым илышыш шыҥдарен. Ялчыже-влаклан келшен, векат, шукышт У ийымат тыште чумырген вашлийыныт.

Шкенан корр.