«Шочмо мландым йӧратен...»

23 ноябрьыште оласе школлаште тунемше марий йоча-влак кокымшо школыш тӱҥалтыш класслаште туныктышо А. Килдиярован эртарыме сӧрал пайремыш - «Шочмо мландым йӧратен...» лудшо-влак конкурсыш - чумыргышт.

Ӱдыр-рвезе-влак моло калык коклаште илат да тунемыт гынат, пайремыште сцене гыч шочмо йылмышт дене марий поэт-влакын эн чечен почеламут корнылаштым йоҥгалтараш нимынярат ышт ӧр. Мӧҥгешла, нунын шинчаштышт шке калык дене кугешныме, йывыртыме кумыл шижалте. А мотор марий тувырым чиен мийыше ӱдыр-влак пайремлан эшеат волгыдо тӱсым пуртышт. Верысе «Тангаур» куштышо ансамбльыште шуаралтше

Т. Саитова ден А. Шаймухаметов сценыште тунар лывыргын чӱчкалтышт - артист койышышт дене чыла погынышо унан кумылжым нӧлтальыч.

Сылнымут конкурсышто тӱҥалтыш класслаште тунемше-влак гыч А. Кудашева икымше (2-шо школ, 4 кл.), К. Галимова кокымшо (14-ше школ, 4 кл.), В. Биктубаева (3-шо школ, 3 кл.) кумшо верым нальыч. Кугурак класслаште тунемше коклаште икымше верыш В. Апсаликова (4-ше школ, 5 кл.) лекте, Н. Идулбаева кокымшо (3-шо школ, 8 кл.) лие, кумшо верым В. Игнатьева (9-ше школ, 6 кл.) ден В. Самиева (3-шо школ, 8 кл.) пайлышт. Е. Андарьяновам (7-ше школ, 5 кл.), А. Александровам (2-шо школ, 7 кл.), Д. Шуматбаевам (2-шо школ, 7 кл.), А. Тимировам (коррекционный интернат-школ, 9 кл.) тауштыме серыш дене палемдыме.