Тошто Чикей эргын кушмо корныжо

Альберт Минлинын ача-аваже ондак колхозын, вара совхозын тыглай пашаеҥышт лийыныт. Рвезе шкежат, кыдалаш школышто шинчымашым налмек, озанлыкыште тӱрлӧ пашаш кошташ тӱҥалын. Совет Армий радамыште порысым шуктен пӧртылмек, «Мичуринский» совхозышто шоферлан ыштен. Совхозын Чикей отделенийысе управляющийже И.Г. Денисов тунам самырык водительлан бригадир сомылым шукташ темлен, ончыкыжым шинчымашым нӧлташ таратен. Альберт, паша деч кӱрылтде, Кушнаренко ял озанлык техникумым да Башкир аграрный университетым тунем лектын.

Тыглай пашазе, водитель, комплекс бригадым вуйлатыше, агроном, совхоз отделений вуйлатыше - теве тыгай паша тошкалтышыже Альберт Бикбаевичын. Тӱрлӧ должностьышто шуаралт шушо специалистым «Акбарисовский» совхозыш директорлан колтеныт. Тудо шкенжым пеҥгыдын йодшо хозяйственник, шотан вуйлатыше семын ончыктен. Варажым тудлан районысо мланде комитетым вуйлаташ темленыт. Туштат шкенжын пашажым ончыктен, у должностьышто кӱлеш корным кычал муын да пайдаланен моштен.

2009 ий гыч тачысе кече марте Альберт Бикбаевич Шаран информационно-каҥаш пуышо рӱдерын директоржо улеш. Районышто ял озанлыкын лектышыже тӱҥ шотышто тиде тӧнежын пашаж деч шога. У ончалтышан вуйлатыше сай деч сай опытым, шинчымашым пога. Тӱрлӧ кундемысе шотан специалист-влак дене пеҥгыде кылым куча. Чехий ден Германийыште курс-влакым эртен. 2011 ийыште, рӱдерын пашажым аклен, республике Правительствын дипломжо дене палемденыт. 2011-2013 ийлаште Россий агропромышленный выставкыште диплом да «Шӧртньӧ шыже» шӧртньӧ, ший, той медаль-влак дене наградитленыт. Альберт Бикбаевич шкежат РФ да БР Ял озанлык министерстве-влакын, район администрацийын Чап грамотышт дене суапландаралтын. 2015 ийыште тудлан «Башкортостан Республикысе ял озанлыкын сулло пашаеҥже» лӱмым пуэныт.

Чолга марий районысо Кресаньык-фермер озанлык-влакын ассоциацийыштым вуйлата, районышто агропромышленный секторысо проф-союз организаций-влакын координаторышт, тугак район Советын депутатше улеш.

Альберт Бикбаевич пытартыш кум ий районысо «Марий вий» национально-культурный автономий мер организацийым вуйлата. Кум ий ончыч районысо марий культур общество исполкомын председательже тудым у мер пашалан кузе тулартымым кызытат шарна. «Альберт Бикбаевич, мый коло вич ий, районысо чолга марий-влаклан эҥертен, кертме семын калык коклаште пашам намияш тыршенам. Тачысе кечын тиде куштылго огыл пашам виктараш тыйын кандидатурет деч посна нигӧм ом уж. Ме, йолгорным ыштен, районышто илыше моло калыклан пионер семын примерым ончыктенна. Эртарыме пашаштынат эре ончыл радамыште лияш тыршенна. Каласкалымем вуйышкет пыште. Марий калык черет дене кӱтымӧ ял вольык огыл. Вет районышто кажне визымше еҥ - марий. Мый дечем сапым лӱдде налаш йодам», - ойленам тунам ончычсо председатель семын. Мер организацийын ончычсо вуйлатышыжым Альберт Бикбаевич эн лишыл полышкалышыже ден наставникше семын ужеш.

Идым тылзе тӱҥалтыште Альберт Бикбаевич 55 ийым темыш. Уста вуйлатышылан, пагалыме мер пашаеҥлан ончыкыжо кугу сеҥымаш-влакыш шуаш тыланыме шуэш, тек илышыже кугу ошкыл дене вийна.

А. АСМАЕВ.