Марий радиолан - 85 ий!

Тиде чапле лӱмгечым тудо 20-шо июньышто палемда. Куанен каласем: 15 ийжым мыят тудын дене пырля улам. Мо оҥайже: тышке мый «Кугарня» газет редакций гыч тольым. Марий радион службыжым вуйлатыше Вячеслав Кольцов деч ӱжмаш пурымеке, шуко шонкалышым: каяш але уке? Кертам мо микрофон дене пашам ыштен? Умылена мо икте-весынам? Марий радион икоян коллективше мыйым пеш порын вашлие да шке шулдыр йымакыже нале. Кугурак ийготан да моткоч кугу опытан радиожурналист-влак шке профессионал мастарлыкыштлан туныкташ тӱҥальыч. Тау нунылан!

Ынде нылымше ий ме «Марий Эл» кугыжаныш телерадиокомпанийын тӱҥ пӧртыштыжӧ - телевиденийын зданийыштыже - верланена. Ик еш улына гын, пырляк, ик леведыш йымалне, ик суртышто илышаш улына. Мутат уке, тӱҥалтыште нелырак лийын. Иканаште у оборудований, у техника дене палыме лияш логалын. У технологий саман вет! А илыш деч вараш кодын ончо-ян! Кузерак ила-шӱла ГТРК радио таче? Мо тудын пӧртыштыжӧ ышталтеш? Шукыштын йӱкыштым пеш сайын паледа але пашаеҥже нерген колында, а шкеже могайрак - радиоприемник кӧргышкӧ пурен от ончал шол. Айста мый тендам шке коллегем-влак дене лишкырак палымым ыштем.

Эрдене пашашке толмеке, кӧ мемнан дене эн ондак саламлалтеш, шонеда? Чын, вуйлатышына - Марий Элын сулло журналистше Вячеслав Кольцов. Тудын воктеч койдымын эртен каен от керт. Паша вержым пе-е-еш сайын йӧнештарыме, чыланат кид-копаштыже гай улына! Эрденысе эфир сайын йоҥген, передача-влак оҥай лийыныт да редакцийышкына нунын шотышто поро йыҥгыр пурен шуктен гын, вашлиеш моткоч весела кумыл дене! Шыргыжалын, мокталтен да у паша кечылан ешартыш вийым пуэн. Коллективна кызыт самырык, сандене Вячеслав Анатольевич шукыштлан ача семын улеш. Илыш опытшат кугу, паша стажшат ятыр. Шкенжын паша книжкаштыже ик паша вер гына - «Марий Эл» телерадиокомпаний. Тудо 35 ий наре Марий радиошто тырша.

Вес ӱшанле пӧръеҥна, поро туныктышына - Марий Эл Республикысе тӱвыран сулло пашаеҥже Аркадий Сергеев. Тудо марла «Пытартыш увер» выпускым ямдыла, шкежак тудым эфир гоч йоҥгалтара, игече дене палдара, передачым ышта гын, колышт куанет. Тудын деке кеч-могай йодыш дене миет гынат, чылалан полша, тыматлын гына умылтара. А эшежым мо мыланна, ӱдыр-влаклан, келша, Аркадий Алексеевич - пеш сай сурт-оза! Иктаж кочкыш рецептым каҥашена ма, пеледыш але сад-пакчасе сомыл нерген ойлена, чылалан тудын вашмутшо да пайдале ой-каҥашыже уло.

А теве мемнан йӱк режиссерна, Марий радион «шӧртньӧ фондшын» озаже Олег Крылов шуко мутланышан огыл. Но шке пашажым сайын пала! Передача-влакым сылнештараш могай муро кӱлеш, тыманмеш кычал муэш да шомак ярымым сем дене сӧрастара. Таклан огыл музыкант. Йошкар-Оласе Палантай лӱмеш музыкальный училищым тунем пытарен. Марий Эл Республикысе тӱвыран сулло пашаеҥже.

Николай Рябчиков - Советский вел марий рвезе. Радион коллективыштыже 2011-ше ий гыч тырша. Эфирын инженержылан. Моткоч скромный рвезе. Но ответственный. Тудын пеленже коллегыже, вес инженерна Татьяна Швецоват пашалан писын тунемеш. Марла кутыраш гына туныктен шуктышаш ыле! Руш ӱдыр, оласе. Но але чылажат ончылно!

Каена умбакыже. Шеф редакторна - Марий Элын сулло журналистше Маргарита Соловьева. Урал кугыжаныш университетын журналистика факультетшым тунем пытарен. Паша опытым Удмурт радиошто поген. Кече мучко тудын деке кажнына иктаж 20 гана тӱрлӧ йодыш дене эҥертена докан. А Маргарита Аркадьевнан ямдылыме «Диалог» передачым уло республикына пала.

Корреспондент Наталья Зилотова кече еда руш йылме дене уверым ямдыла. Уверым погаш - манаш веле! Да, келшем, кызыт интернетыште пеш шуко увер сайт уло. Увержат лыҥак. Но кажныже чын, нунылан ӱшанаш лиеш мо? Чыла уверым тергыман, республикысе министерстве ден ведомствылашке лекман, район-влак дене кылым кучыман. Оршанка район Чирки ялын шочшыжо Наталья Зилотова тидым моштен ышта. Тудлан кеч-кунам ӱшанаш лиеш.

Шукерте огыл коллективышкына эше ик пашаеҥ ушныш - Ольга Малова (Коробкова). Пытартыш жапыште тудо Марий радион руш эфиржым почеш, чылаштлан поро эрым тылана!

Шукынжо йодыда докан: «Марий Элын калык артисткыже Августа Романоваже кушто?» Кузе вашешташ шкеж деч йодым. «Кажне мӧрын - шке жапше. Паша гычат шке жапыштыже кайыман. Чонем дене самырык улам гынат, самырык-влаклан верым пуыман». Тыге ойлаш кӱштыш. «Йоча годсек эре радиом колыштам ыле. Тунам Марий радио 8 шагат кас марте ойлен. Марий спектакль-влак пеш келшеныт. Тидын годым эре шоненам: «Мыят тушто пашам ыштышаш ыле». Илен-толын тыгак лие», - порын шарналта Августа Владимировна. Тунем лектынже тудо артистлан. Марий самырык театрыште пашам ыштыме годымак Радио пӧртышкӧ передача-влакым вӱдаш коштын. Ик эн йӧратыме передачыже «Поро кас!» лийын. Тудын 40 ийже гыч коло визытшым лач Августа Романова вӱден.

Черет шуо корреспондент Диляра Никитина дене палымым ышташ. А тудо могай передача-влакым ямдыла? «Собеседник», «Вестник столицы», «Слово о мастере». «Между Волгой и Уралом» радиожурналым гын Марий Элыште веле огыл, Российын шым регионыштыжо колыштыт. Журналист геройжымат эре ойыртемалтшым кычалеш: самырык-влакымат, кугыеҥ-шамычымат вашке шке велкыже савыра.

Марий тематический передача-влакым мый (Татьяна Хлобыстова) да Алевтина Кузнецова ямдылена. Кузе лектеш - тыланда акым пуаш. Иктым раш каласен кертам: шке пашанам йӧратен ыштена. Алевтина Петровна келшен илыше радио коллективышкына идалык тӱҥалтыште веле тольо гынат, иканаште ушныш. Вет пашажат тудлан у огыл. Регион 12 телеканалыште, Марий Эл радиошто, «Марий Эл» газетыште журналист сомылым шуктен. Поснак палемден кодымо шуэш А. Кузнецован «Кугезе сугынь» передачыжым. Тудо марий калыкнан илыш йӱлаже, пайрем шотшо да радамже нерген. Тидыжым ме палышаш да жаплен шогышаш улына, шонем. Келша мыланна чон пуэн пашам ыштен моштымыжо, лыжга кумылжо да сайлан гына ӱшанен илаш кӱлеш манын туныктен ойлымыжо.

Марий радиошто Пошкырт кундемын шочшыжо-влакат пашам ыштеныт. Мемнан рашемдыме почеш нунын коклаште поэтесса М.А. Аюпова (Пӱрӧ район, Кужнур ял), Марий Элын калык писательже А.М. Юзыкайн (Краснокам район, Чормак), Т.М. Ишмурзин (Шаран район), журналистикын ветеранже, писатель В.И. Ижболдин (Калтаса район, Кӧкыш), Марий Элын сулло журналистше Л.Г. Гимаев (Мишкан район, Лепешкан), И.Д. Кутлуметов (Мишкан район, У Эшым) лийыныт. Кызыт Марий Эл культурын сулло пашаеҥже А.А. Сергеев (Дӧртыльӧ район, Чарлак) да А.П. Кузнецова (Мишкан район, Тынбай) тыршат.

Мый шке коллегем-влакым, «Марий Эл» ГТРК радион ветеранже ден поро йолташыже-шамычым чапле лӱмгече дене саламлем! Саман вашталтеш ма, паша коллектив уэмеш ма, Марий радио ойлаш тӱҥалеш!

Редакций деч. Тиде материалым савыктыме деч ончыч редакцийышкына тыгай увер пурен. Кужу жап радиошто пашам ыштымыжлан да сай паша лектышым ончыктымыжлан Марий радион службыжым вуйлатыше В.А. Кольцовлан Россий Федерацийысе связь да коммуникаций министерствын «Российын почетный радистше» лӱмым пуэныт. Тыгак Марий радион йӱк режиссержо О.С. Крыловлан тиде министерствынак Чап грамотыжым пуаш пунчалым лукмо.