ЧЫЛАЖАТ ТАЛЕ ДА ПАТЫР-ВЛАК ЛӰМЕШ

Вячеслав икымше курсышто тунемеш, триатлон дене спорт мастерыш кандидат, Бирск районысо Кужнур ялын рвезыже, Нефтекамскыш тунемаш толмешкыже, Кугу Соказаш (Мишкан район) тусо ДЮСШ-н тренерже Ю.Б. Айгузин деке тренировкыш коштын. А Виктор олаште шочын-кушкын, кызыт нефтяной колледжын кокымшо курсыштыжо тунемеш. Но фамилийжым колын, шарналтыше-влак лектыт докан, ача-аваже Мишкан районын чемпион-влакым куштышо ялже - Монар могырым улыт.

Виктор Яншаевлан тыгай кӱкшытыш шуаш оласе 4-ше школышто тунеммыж годым марий тренер-преподаватель В.Б. Васильев дене заниматлымыже полшен. Владислав Борисович куштылго атлетика дене ятыр тале спортсменым куштен, нуно республикыште да федеральный таҥасымашлаштат сеҥымашке шуыныт. Олаште гын тиде школын командыже - эре ончылно. Тачат школ-влак коклаште эстафетын чемпионжо лӱмым сулен нальыч.

А Виктор Яншаевын Карина шӱжарже эше 9-ше классыште веле тунемеш гынат (4-ше школышто тудат В.Б. Васильев дене заниматла), Россий кӱкшытыштат ойыртемалт шуктен. Эртыше теле сезонышто (Телым манежыште таҥасат) Ульяновскышто 1000 метран дистанцийыште Российын вице-чемпионжо (кокымшо вер) лийын, а теве ик арня ончычрак Российысе таҥасымаш гыч (Нижний Новгород ола) адак сеҥымаш дене пӧртылын. Туштат, ты гана 3000 метрыш куржмаште, кокымшо верыш лектын.

Сеҥымаш кечым сӧрастарыше тыгай тале ӱдыр-рвезе-влаклан посна вуйым савыме да таум ойлымо шуэш!