Кугу Сеҥымашлан - 77 ий

Районла ден олалаште торжественный парад, пайрем концерт-влак, «Мый «шаймуратовец» лиям» акций, талантан икшыве-влакын «Достояние республики» IX республикысе слетышт, школлаште да краеведений музейлаште экскурсий, Сеҥымаш кечылан лӱмдымӧ сочинений, «Памяти героев. Связь поколений» военно-патриотический конкурс-влак эртат, салтак пучымышым шолтымо полевой кухньо-влак пашам ышташ тӱҥалыт. «Шарнымаш сад» тӱнямбал проект дене келшышын, кундемыште Герой-влакын аллейыштым, «Сеҥымаш чодырам» шындат. Муниципалитет-влакын кинозалыштышт военно-патриотический шӱлышан отечественный фильмым ончыктат, литератур да поэзий кас-влакым ямдылат. 

Сеҥымаш кечын калык тыгак «Георгиевский лента», «Курымашлык полк» акцийлаш, «Сеҥымашын вальсше» республикысе флешмобыш ушнен кертеш. Уфа олаште Сеҥымаш кечым «Торатау» конгресс-холлышто пайрем концерт да салют дене мучашлат. Кастене тушто кундемысе творческий коллектив-влак, тыгак Российын калык артистше Николай Басков да РСФСР-ын калык артистше Лев Лещенко калыклан военно-патриотический муро-влакым йоҥгалтарат, тыныс илышым пӧлеклыше ветеран-влакым чапландарат.