Землякем дене кугешнем

Ишмай Иштубаевичым ялыште землякше-влак «Эшмай герой» маныт. Тудо 1914 ий 15 декабрьыште шочын. Ачаже, Эшкынай, ешым варарак, ийготым погымеке чумырен. Тудо шкеж деч латныл ийлан самырык ӱдырым, Калтаса район Тошто Яш ял гыч Екатерина Кроловаевнам (фамилийже пале огыл) марлан налын. Ишмай деч посна ешыштышт Марзиба (1924 ий) ден Маркиба (1928 ий) лӱман ӱдыр-влак шочыныт. Маркибан шочмыж годым ачаштлан 60 ият темын.

Ишмай Иштубаевич тунемаш йӧратен. Тудо 1928 ийыште тӱҥалтыш школым, 1934 ийыште агрономий курсым, визымше класслан курсым тунем лектын. Военный айдеме лияш шонен, сандене Улан-Удэ олаште службым эртымыж годым младший командир-влак курсыш тунемаш пурен. 1943 ийыште тудым Забайкальский военный округысо войскаш налыныт. Тушто ик ий наре пулеметчиклан тунемын да фронтыш каен. Волхов ола верч кучедалмаште сусырген. Эмлалтмеке, Рязань областьысе пехотный училищыште тунемын. Москваште офицер-влак курсыштат шинчымашыжым кумдаҥден. 1945 ийыште кумшо Белорусский фронтышто пулеметный взводын командирже лийын. Тушман ваштареш кучедалмаште патырлыкым ончыктымыжлан тудым Йошкар Шӱдыр орден дене палемденыт.

А Кенигсберг ола верч кучедалмаште Ишмай Иштубаевич поснак ойыртемалтше патырлыкым ончыктен. Моло салтак дене пырля нуно тусо ик казематым пудештареныт. Тидлан кӧра тушто 4 пулеметым, 45 немыч салтак ден офицерым пытарыме. Нунын взводышт тушманын пулемет тулым виктарыме пӧртым авалтен. Тугодым 50 немыч салтак колен, 24 cалтакым пленыш налыныт. Штурм годым И.И. Ишкинин уэш сусырген. 19 апрельыште тудлан «Совет Ушемын Геройжо» лӱмым пуэныт. Тулеч вара Ишмай Иштубаевич 1946 ий марте Симферополь олаште служитлен. Тушеч тазалыкше начареммылан кӧра запасыш уволитленыт. Тудо олаштак шкеж деч латныл ийлан самырык Лидия Георгиевна Малышева дене ешым чумырен. 1946 ийыште нуно пелашыж дене шочмо ялышкыже пӧртылыныт. Ишмай Иштубаевич пелашыжлан Эшым олаш каена манын улмаш. Самырык ешын кок эрге да ныл ӱдыр шочыныт.

Ишмай Иштубаевич сар деч ончычат гармонь дене удан огыл шоктен. Ик ялысе пайремат тудын деч посна эртен огыл. Садлан сар деч вара ялысе клубым вуйлатен. Тыгак пасуласе бригадыште ороллан да пожарныйлан ыштен. Тудым чӱчкыдын имне ӱмбалне кудалшым ужаш лийын. Писылыкым йӧратен, поро чонан лийын. Ачамын каласкалымыж гыч, Ишмай Иштубаевич кок сай урлык пийым кучен, нуно кеч-куштат озашт пелен лийыныт. 1964 ий августышто трагически колымекыжат, шӱгарже воктеч кораҥын огытыл...

…Ий-влак эртат. Ме, ончыкылык тукым, сарыште патырлыкым ончыктышо айдеме, марий калыкын талешкыже, Совет Ушемын Геройжо Ишмай Иштубаевич Ишкинин нерген шарнымашым эре шӱм-чоныштына арален илаш тӱҥалына.