Все новости

Шарнымаш - вий-куатыштым чонышто ашнаш

Май - Сеҥымаш пайремын тылзыже. Но Кугу сарын историйже да тудын тулыштыжо кредалше-влак нерген Сеҥымаш кече вашеш але юбилей дене кылдалтше пайрем годым веле огыл шарналтыман. Мыняре шукырак торлена Ачамланде верч кучедалме шучко сар деч, тунаре шукырак ме шымлышаш, лудшаш, возышаш улына тидын нерген. Мондыдымашын. Шарнымаш кыл ынже кӱрл манын. Тукым вашталт толеш. А кузе шарнымаш аралалт кодшаш? Фронтовик коча-влакын фотосӱретыштым кучен, «Курымашлык полк» семын ошкыл эртымаш тений ыш лий. Коронавируслан верчын. Но колоннышто шӱдӧ, тӱжем дене сӱрет-влакым нумал кайыме годым кажныжым ужынат от шукто. Кӧ тудо, могай айдеме, сӧйыштӧ кузе кучедалын, илыше пӧртылын але шикш-тул дене авалтше вӱран пасушто вуйжым пыштен? Тидым палаш ок лий. Чаманаш логалеш, нумал кайыше самырык-влак гыч южиктыже шкежат кочажын але шочшыжын сар корныжым, тудын могай лиймыжым шотшо дене ок пале. Тыгеат лиеш улмаш. А студент-влак деч 75 ий ончыч чарныше сар нерген йодат гын… Тушманын Енисей эҥерым вончен кертдыме амалым мемнан салтак-влакын виянрак лиймышт дене умылтарышыжат уло… Сарын историйже, элын географийже - ни ушышто, ни чонышто…

Садлан Кугу сар да тудын талешке салтакше, тылыште окопысылак йӱдшӧ-кече тазалыкыштым чаманыде тыршыше-влак нерген материалым кычалман, шоҥгырак-влак деч йодыштман, возыман да летопись семын арален кодыман. Ий-влак эртыме семын Сеҥымаш пайремым умылен моштымо келгытым тӱрлӧ шоу да флешмоб дене висыман огыл.
Тидын шотышто лудшына-влаклан таум каласыме шуэш. Нуно, май тылзым вучыдеак, фронтышто кучедалше, тылыште сеҥымашым тапташ полшышо ачашт-авашт, кочашт-кувавашт, родо-шочшышт нерген серымыштым редакцийыш колташ тӱҥальыч. Чылажымат савыктен шуктен огынал эше. Но, Сеҥымаш пайрем эртен гынат, умбакыжат ямдылена да печатлаш тӱҥалына. Ик серышыштымат огына кодо. Тыге историеш кодшо пуламыр да тудын еҥже-влак нерген возышо нуным шке гына огыл шарнен ила, родо-шочшо тукымжым да моло еҥымат палдара, салтакын подвигше, эрык верч кучедалме неле илыш корныжо документ семын ешыштышт, кугыжаныш библиотеке ден архивлаште курымеш аралалташ тӱҥалыт. Чап лийже нунылан. Вуйым савена нунын нерген келге шарнымашым арален кодышаш верч тыршыше-влаклан.
Лудын лекмек, редакцийыш йыҥгыртыше, кумыл тодылт ойлышо-влакат улыт. Тауштат. Шинчавӱд дене. Конешне, эн ончычак возышо автор-влаклан. Тугеже, пырля ме кӱлешан пашам шуктена. Шарнымашым калык чонышто саклена. Тугеже, газетнат калыклан кӱлешан. Огына чакне!
Читайте нас в