Сар жапым уэш шарныкта

Кугу Ачамланде сар пытымылан 75 ий темме лӱмеш Йывангасоласе тӱвыра пӧртыштӧ «Сеҥымаш салют» фестивальым эртарышт.

Тудлан тылзе ончычак ямдылалташ тӱҥалыныт. Еҥ-влак деч ожнысо вургемым: фуфайкым, йыдалым, пешметым, мыжерым, шальым, война гыч толшо ветеран-влакын шинельыштым, сар гыч возымо серышыштым, наградыштым, похоронкыштым погеныт. Ял калык кертмыж семын полшен. Мероприятий нерген калыклан ондакак увертарыме ыле.

Теве вучымо кече толын шуо. «Сеҥымаш салют» сарыште вуйыштым пыштыше-влакым шарныме лӱмеш обелиск воктек пеледыш аршашым пыштыме дене тӱҥале да вараже тӱвыра пӧртыштӧ шуйныш. Фойеште «сар шӱлыш» озаланен. Ик лукышто бомбоубежищым, весыште сар пагытысе школым, воктенжак концлагерьым - кӱртньывоштыр шеҥгелне шогышо чарайолан, лавыргыше икшыве-влакым, война пагытысе пӧрт кӧргым да шоҥго кован шужышо йоча-влакым пукшымыжым ончыктеныт. Сар ийлаште неле паша шукыжым ӱдырамашлан логалын. Тыгай сӱретым «Чодыра руымаште - канымаш» театрализованный представленийыште илалше-влакын «Ош йӱксӧ» фольклор ансамбльышт модын ончыктыш.

Умбакыже действий сценыш кусныш. Левитанын йӱкшӧ, школ дене чеверласыме амал дене веселан юарлыше ӱдыр-рвезе-влакын куаныштым кӱрльӧ. А кунам военный вургемым чийыше Л.В. Алынбекова да Э.В. Гаврилова «Эхо любви» мурым шергылтарышт да ӱдыр-влак, вальсым куштен, йолташышт дене чеверласышт, ончаш толшо калыкын шинчавӱдшат лекте. Программа тӱрыснек кинолента семын эртыш, ик действий весым алмаштыш. Теве салтак-влак кредалмаш деч вара «В землянке» мурым мурен шинчат, иктыже оҥжо пелен йӧратыме пелашыжын картычкыжым ӧндалын, весе серышым воза, кумшо автоматшым тӧрла…

Умбакыже тиде сӱретым йоча-влак алмаштышт. Нуно «Пой, солдат, пой» мурым, а С. Зайнетдинов «Ты ждешь, Лизавета» мурым йоҥгалтарышт. Ожнысо вургемым чийыше ӱдырамаш ден йоча-влак шошым пырчым ӱдымӧ сӱретым ончыктышт. Чарайолан йоча-влакын шогам шӱдырен кайымышт, нунын почеш ӱдырамаш-влакын «Куэрлаште вӱд воктен» мурым мурен-мурен ӱдымышт тунамсе неле илышым тичмашынрак почын пуаш полшышт. Салтак вургеман ӱдыръеҥын военкомат гыч аваж дек чеверласаш куржын толмыжо действийым эше чотрак вияҥдыш. Тиде рольым Йывангасола тӱвыра пӧртын вуйлатышыже Л.В. Алынбекова ден библиотекарь Э.В. Гаврилова келгын почын пуышт, залыште ончен шинчыше-влак шинчавӱдыштымат ӱштыльыч.

Мучашлан мемнан калыкын фашистым сеҥымыж нерген Левитанын увержым колыштна. Фестивальын участникше-влак Сеҥымаш кечым туге устан модын ончыктышт, пуйто чынже денак уэш война пытыме куанле кечыш пӧртылна.

Фестивальым зртараш Йывангасола ялсовет вуйлатыше К.К. Зайнакаева, школ да йочасад пашаеҥ-влак полшеныт. Чылаже 80 еҥ участвоватлен. Йывангасола ялсовет вуйлатыше К.К. Зайнакаева фестивальын штандартшым да альбомжым, курымашлык тулын капсулжым Арлан ялсовет вуйлатыше Р.А. Сатаевалан кучыктыш. Умбакыже «Сеҥымаш салютым» нуно эртарат.

Тиде пайремым эртараш шуко вийым пыштыме. Культура пашаеҥ-влакын тыршымышт арам лийын огыл - район гыч ончаш толшо жюри да погынышо калык мероприятийым кӱкшын аклышт.

Л. АЛЫНБЕКОВАН фотожо да видеоматериалже-влак.

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».